Լիբիայի նախկին առաջնորդ Մուամար Քադաֆիի դեմ գործողություններ իրականացնող կոալիցիան ռազմական գործողությունների հենց սկզբից տապալման եզրին էր և իր պահպանման համար պարտական է ԱՄՆ պետքարտուղար Հիլարի Քլինթոնին: Այս մասին գրում է The Washington Post պարբերականը` վկայակոչելով եվրոպացի դիվանագետներից մեկի խոսքերը, որը պատմել է լիբիական արշավում ԱՄՆ ունեցած դերի մասին:
Պարբերականի զրուցակիցը նշել է, որ Քլինթոնն օգնել է կարգավորել Ֆրանսիայի և Իտալիայի միջև հակասությունները: Թերթը գրում է, որ Իտալիայի վարչապետ Սիլվիո Բեռլուսկոնիին զայրացրել է այն հանգամանքը, որ ֆրանսիական կործանիչները հարված են հասցրել լիբիական զորքերի ուղղությամբ մարտի 19-ին` արշավի պաշտոնական սկզբից 3 ժամ առաջ: Ուստի Բեռլուսկոնին սպառնացել է փակել իտալական օդային բազաները Դաշինքի ինքնաթիռների համար: Քլինթոնին, սակայն, հաջողվել է կարգավորել խնդիրը:
Բացի այդ, պարբերականը գրում է, որ, չնայած Պետդեպարտամենտի իրավաբանների բազմաթիվ զգուշացումներին, հենց Քլինթոնն է համոզել Բարաք Օբամային ճանաչել Լիբիայի ապստամբների Ազգային անցումային խորհուրդը: Դա ապստամբներին ԱՄՆ կողմից սառեցված Քադաֆիի հաշիվներից օգտվելու հնարավորություն տվեց: Քլինթոնը համոզել է ճանաչել ԱԱԽ-ն նաև այլ երկրների:
