Ռուսաստանի Դաշնության արտաքին գործերի նախարար Սերգեյ Լավրովը, խոսելով Հավաքական անվտանգության պայմանագրի կազմակերպության մասին, ասել է, թե Ղրղզստանում անցած ամառվա ընթացքում տեղի ունեցած անկարգությունները բացահայտեցին, որ պետք է բարելավել ՀԱՊԿ-ի հակաճգնաժամային արձագանքման մեխանիզմները: Նրա խոսքերով, Մոսկվայում անցկացվող կազմակերպության նստաշրջանը մեծ կարևորություն ունի և նպատակ ունի որակապես փոխել կազմակերպության կողմից անդամ երկրների շահերի պաշտպանությունը:
«Մեզ համար ակնհայտ է, որ Ղրղզստանի դեպքերը կազմակերպության ամրության փորձաքար դարձան: Համատեղ ջանքերով հնարավոր եղավ ընդունել համալիր միջոցառումներ: Դա կրկին ապացուցեց ՀԱՊԿ-ի՝ որպես նախկին խորհրդային տարածքում կոլեկտիվ անվտանգության ապահովման կարևոր տարրի պահանջվածությունը»,- ասել է Լավրովը ՀԱՊԿ անդամ երկրների պաշտպանության, արտաքին գործերի նախարարների և անվտանգության խորհուրդների ղեկավարների համատեղ նիստի ժամանակ:
Բանակցությունները, նրա կարծիքով, պետք է ավարտեն համապատասխան փաստաթղթերի պատրաստման «քրտնաջան և շատ ակրևոր աշխատանքը, որը պետք է հաստատվի այս նստաշրջանի ժամանակ»: Հաջորդ տարի ՀԱՊԿ նախագահությունը կանցնի Բելառուսին: Այս մասին հաղորդում է РИА-Новости գործակալությունը:
