Այսօր կառավարության շենքի մոտ ժամանակավորապես անաշխատունակ ճանաչված անձանց իրավունքների պաշտպանության հասարակական նախաձեռնության անդամները, մասնավորապես հղի կանայք, պահանջում էին ՀՀ կառավարությունից հանդես գալ «ժամանակավոր անաշխատունակության նպաստների մասին» օրենքում փոփոխություններ կատարելու օրենսդրական նախաձեռնությամբ:
«Մենք բոլորս էլ աշխատում ենք, և երբ օրենքն ընդունվեց, միավորվեցինք և ներկայացնում ենք մեր բոլոր մտահոգությունները ՀՀ վարչապետին։ Եթե վարչապետը չարձագանքի մեր նամակին, մենք կշարունակենք բողոքի ակցիաները, մինչև մեզ ուշադրություն դարձնեն և լսեն:
Օրենքը հակասում է պետության վարած քաղաքականությանը երիտասարդ ընտանիքներին աջակցության ոլորտում, օրենքը ոտնահարում է մի խումբ մարդկանց իրավունքներ, որոնք ՀՀ Սահմանադրությամբ ամրագրված հավասարության իրավունք ունեն և, վերջապես, օրենքը բոլոր դրույթներով և բոլորին վնասում է»,- իր վրդովմունքն արտահայտեց նախաձեռնության անդամներից մեկը` Տաթևիկ Դավթյանը:
