ՀԱԿ անդամ, «Ժողովրդավարական ուղի» կուսակցության նախագահ Մանուել Գասպարյանն «Առաջին լրատվական»-ի հետ զրույցում խոսելով ՀԱԿ երեկվա հանրահավաքում Լևոն Տեր-Պետրոսյանի ելույթի մասին՝ նշեց, որ անկասկած ՀԱԿ-ը չպիտի բացառի ընտրությունները և զերծ պահի իրեն ու հասարակությանը, քանզի ցանկացած ընտրություն քաղաքական գործընթաց է:
Նշենք, որ ՀԱԿ առաջնորդ Լևոն Տեր-Պետրոսյանը երեկվա հանրահավաքում նշել էր, որ Կոնգրեսն ամեն ինչ կանի արտահերթ ընտրության հասնելու համար, սակայն ամեն ինչ չէ, որ կախված է Կոնգրեսից, և պետք է լինել ցանկացած զարգացման պատրաստ: Տեր-Պետրոսյանը նշել էր, որ Կոնգրեսը պետք է մասնակցի խորհրդարանական ընտրություններին և ԱԺ-ում ունենալով ծանրակշիռ ներկայացվածություն՝ իմփիչմենթ հայտարարի Սերժ Սարգսյանին:
Մանուել Գասպարյանը նկատեց, որ Կոնգրեսը պետք է պատրաստվի հերթական ընտրություններին, բայց արտահերթը պետք է մնա օրակարգային հիմնական հարցը: Նա նաև հավելեց, որ նախագահի ելույթում կոչ կար եվրոպական կառույցներին, որ ավելի հետևողական լինեն հայաստանյան ընտրությունների արդյունքների առումով: Ըստ Գասպարյանի՝ Կոնգրեսը պետք է ապավինի սեփական ուժերին, ոչ թե իր հույսը դնի Եվրոպայի վրա, քանզի Եվրոպան միշտ դիտորդի կարգավիճակում է հանդես եկել և հետևություններ էլ արել է սեփական շահերից ելնելով:
Գասպարյանի խոսքերով՝ իշխանությունները խոհեմ չեն գտնվելու և Ընտրական օրենսգրքում ոչ մի դրական փոփոխություն էլ չեն անելու. «Նախագահի առաջարկը միգուցե ընդունելի է, բայց չեմ կարծում, որ նման ձևով նրանք կգնան ընտրությունների: Իշխանությունները փորձելու են իրենց հին մեթոդները կիրառելով ապահովել իրենց վերարտադրությունը»:
