«S.O.S Սևան» կանաչ ակցիայի մասնակիցների հայտարարություն է տարածել, որում մասնավորապես ասված է.
«Հայաստանում իր գործունեության հենց սկզբից «GeoProMining Gold» ընկերությունը մտադրություն հայտնեց Արարատից ոսկու կորզման ֆաբրիկան տեղափոխել Սոտք` խախտելով «Սևանա լճի մասին» ՀՀ օրենքը: Օրենք, որը Սևանը պաշտպանում է լճի համար վնասակար արտադրական ձեռնարկությունների ազդեցությունից: Երկու տարի շարունակ հասարակությունը պայքարեց ընկերության ծրագրերի դեմ` հայտարարելով S.O.S. Սևան: Միայն երկրի նախագահի 2009թ. աշնանը դրսևորած քաղաքական կամքի արդյունքում Սոտքում ոսկու կորզման արտադրության կառուցման նախագիծը փակվեց:
Երկու տարի անց ընկերությունը վերսկսել է իր ծրագրերի իրագործումը: Այլևս քննարկում չկա բարձրաստիճան չինովնիկների և գիտական ինստիտուտների հետ, չկան նաև պաշտոնական փաստաթղթեր: 2011թ. մարտին առանց որևէ թույլատրող փաստաթղթի, առանց բնապահպանական փորձաքննության անցկացման, հրաժարվելով մասնակցել Սոտք գյուղում տեղի ունեցած հասարակական լսումներին, անտեսելով երկրի օրենքները և առաջին հերթին «Սևանա լճի մասին» ՀՀ օրենքը, «GeoProMining Gold» ընկերությունը Սևանա լճի ավազանում` Սոտքում, կառուցեց ջարդող-տեսակավորող համալիր: Չնայած նրան, որ ՀՀ նախագահին առընթեր Սևանա լճի հիմնահարցերի հանձնաժողովի շրջանակներում ստեղծված մոնիտորինգային խումբը ընկերության գործողություններին ծայրահեղ բացասական գնահատական տվեց, չնայած Սոտքի հասարակական լսումների մասնակիցների` այդ անօրինությանը վերջ տալու մասին դիմումին` ուղղված բոլոր պատասխանատու մարմիններին, իրավասու մարմինների կողմից համարժեք պատասխան ռեակցիա չհետևեց:
Մենք ունենք համազգային և պետական արժեք` Սևանա լիճ: Սոտքում կառուցված նոր արտադրամասը բազմիցս ավելացնում է ոսկու կորզումից հետո ապարներում պարունակվող ծանր և տոքսիկ տարրերով, մկնդեղով, անտիմոնով, պիրտով Սևանա լճի աղտոտման ռիսկերը: Մանրացված տեսքով այդ տարրերը հեշտությամբ վերածվում են տոքսիկ միացությունների և տարածվում շրջակա միջավայրում, ապա թափանցում Սևանա լիճ: Ընկերության գործունեության ավարտից հետո այդ վայրում կմնա 100 միլիոն տոննա ապար, և որոշակի ժամանակ անց Սևանը ոչ թե կմնա որպես 34 միլիարդ խմ քաղցրահամ ջրի ռազմավարական պաշար, այլ կվերածվի Սոտքի արտադրության պոչ լճի:
Ընկերությունը հաստատակամ է իր ծրագրերում, քանի որ արդեն զբաղվում է Արարատի ոսկու կորզման ֆաբրիկայի վերազինմամբ, հզորության ավելացմամբ: Հայտարարում է, որ դրա համար օգտագործում է նոր տեխնոլոգիաներ: Բայց ամենանոր տեխնոլոգիան Սոտքի անօրինական արտադրամասն է` վերոնշյալ ջարդող-տեսակավորող համալիրը:
Պետական չինովնիկներից ոչ ոք պատասխանատվություն չի կրում Սևանի էկոհամակարգի պահպանության համար` ոչ նրա համար, որ Սևանա լճից անհետացել են ձկների արդյունագործական պաշաները, ոչ լեռնահանքային ձեռնարկությունների անօրինական գործունեության համար, ոչ նրա համար, որ շարունակվում է քաղցրահամ ջրի ռազմավարական պաշարի աղտոտման գործընթացը:
Մենք` S.O.S. Սևան նախաձեռնող խումբը, պահանջում ենք, որպեսզի ՀՀ բնապահպանության նախարարության բնապահպանական պետական տեսչությունը ստուգումներ անցկացնի Սևանի վերաբերյալ ահազանգների հիման վրա և հասարակայնությանը ներկայացնի համապատասխան ակտերը:
Պահանջում ենք, որպեսզի պետական մարմինները միջոցներ ձեռնարկեն անօրինաբար կառուցված համալիրի ապամոնտաժման ուղղությամբ և պատժեն «GeoProMining Gold» ընկերությանը` ՀՀ ազգային օրենսդրության խախտման համար:
Պահանջում ենք, որպեսզի ՀՀ բնապահպանության նախարար Արամ Հարությունյանը և ՀՀ էներգետիկայի և բնական պաշարների նախարար Արմեն Մովսիսյանը, որոնց ստորագրություններն են դրված Սևանա լճի ջրահավաք ավազանում գործող լեռնահանքային ընկերություններին թույլատրող փաստաթղթերի վրա, դադարեցնեն այդ ընկերությունների գործունեությունը մինչև մոնիտորինգ չանցկացվի` պարզելու նրանց գործունեության համապատասխանությունը «Սևանա լճի մասին» ՀՀ օրենքի դրույթներին: Մասնավորապես խոսքը «GeoProMining Gold»-ի, «Գեգամետ Պլյուս»-ի, որը Սևանա լճի ափից ընդամենը 2 կմ հեռավորության վրա զբաղվում է քրոմ պարունակող հանքանյութի վերամշակմամբ, և Արդանիշի թերակղզու յուրահատուկ կենսաբազմազանությամբ հարուստ բնական լանդշաֆտը ոչնչացնող «Միկա Ցեմենտ»-ի մասին է:
Մենք դիմում ենք բոլոր քաղաքական կուսակցություններին և մեր երկրի քաղաքացիներին: Չկա Սևան, չկա և Հայաստան: Մոռացեք քաղաքական և այլ տարաձայնությունների մասին, միացեք մեզ` փրկենք Սևանը»:
Հայտարարության տակ ստորագրել են՝
Էկոլոգիական հասարակական դաշինքը, «ԷկոԼուր» տեղեկատվական ՀԿ-ն, «Թռչնասերների կենտրոն» ՀԿ-ն, «Հայաստանի կանաչների միություն» ՀԿ-ն, Հելսինկյան քաղաքացիական ասամբլեայի հայկական կոմիտեն, «Քաղաքացիական ազգային նախաձեռնություն» ՀԿ-ն, «Էկոդար» ՀԿ-ն, Հայկական տեխնոլոգիական ակադեմիան, Ա1+, «Հիմա» քաղաքացիական նախաձեռնությունը և
«Քայլ» համայնքային զարգացմանն աջակցող Հասարակական կազմակերպությունը:
Հայտարարությանը հրապարակման պահից միանում է նաև 1.am «Առաջին լրատվական»-ը:
