Օտարերկրյա մամուլը նույնպես անդրադարձել է Երևանի քաղաքապետ Գագիկ Բեգլարյանի հրաժարականի լուրին: Հիմնականում անդրադարձ է եղել ռուսալեզու մամուլում, իսկ վերնագրերը եղել են գրեթե միանման` «Կռվարար քաղաքաապետը հրաժարական է տալիս»:
Երևանի քաղաքապետի հրաժարականի լուրի մասին գրել է Euronews-ն իր կայքում՝ տեղեկացնելով, որ պաշտոնական աղբյուրները նախ հաստատեցին, որ միջադեպ եղել է, ապա հայտարարեցին հրաժարականի մասին, սակայն չեն հայտնում միջադեպի մանրամասները: Կայքը պատմել է միջադեպի մասին` հղում անելով ինտերնետ կայքերում տեղադրված լուրերին:
GazetaSNG-ն գրում է, որ այս հակամարտությունը, որի մեջ ներքաշված է Սերժ Սարգսյանը, ինչ-որ առումով նման է այն իրավիճակին, որ ձևավորվել էր Ռուսաստանում, երբ Մոսկվայի նախկին քաղաքապետ Յուրի Լուժկովը Մեդվեդևի հասցեին հնչեցրած քննադատության համար զրկվեց իր պաշտոնից: Հիմա Հայաստանի ներքաղաքական պայքարն անցել է «կուլիսային փուլի»: Ըստ որոշ աղբյուրների՝ հակամարտությունը կարող է ավելի խոր լինել, քան թվում է: Վարկածներից մեկի համաձայն՝ Երևանի քաղաքապետը սկսել է մերձենալ նախկին նախագահ Ռոբերտ Քոչարյանի հետ, որը պայքար է մղում ներկայիս նախագահի թիմի դեմ:
Կան նաև այլ հետաքրքիր վերնագրեր` «Երևանի քաղաքապետն ապացուցեց, որ ինքն իրոք «Չոռնի Գագոն» է» (բելառուսական Naviny), «Երևանի քաղաքապետը սկանդալ սարքեց և հեռացավ» (НГ):