Սույն թվականի նոյեմբերի 5-13-ը Փարիզում տեղի կունենա ծանրամարտի աշխարհի առաջնությունը: Մեր տղամարդկանց և կանանց ազգային հավաքականները այս օրերին նախապատրաստական հավաքներ են անցկացնում. տղամարդիկ`մերձմոսկովյան Պոդոլսկում, կանայք` Աբովյանում:
Առաջնության մեկնարկից առաջ ստացվեց հերթական բացասական լուրը. մարզման ժամանակ վնասվածք է ստացել 85 կգ քաշային կարգում հանդես եկող Արայիկ Միրզոյանը, ինչի պատճառով նա բաց կթողնի աշխարհի առաջնությունը:
Ավելի վաղ վնասվածք էին ստացել և Փարիզ չեն մեկնի նաև 85 կգ քաշային Արա Խաչատրյանը, 77 կգ քաշային Գևորգ Դավթյանը, 85 կգ քաշային Տիգրան Վ.Մարտիրոսյանը:
Հիշեցնենք, որ ավելի վաղ ծանրամարտի միջազգային ֆեդերացիան հրապարակել էր այն մարզիկների անունները, ովքեր արգելված խթանիչներ օգտագործելու պատճառով որակազրկվել են մինչև 2015 թվականը: Այդ ցուցակում էին նաև մեր հավաքականի ներկայացուցիչներ` 94 կգ քաշային Գևորիկ Պողոսյանի և 53 կգ քաշային Էլեն Գրիգորյանի անունները: Հայաստանի ծանրամարտի ֆեդերացիան բողոքարկեց այդ որոշումը, և պետք է անցկացվի նոր ստուգում` B խմբի անալիզներով:
