Այսօր «Արմատ» մամուլի ակումբում կայացած ասուլիսում բազկամարտի ՀՀ հավաքականի գլխավոր մարզիչ Արման Փիրոյանը նշեց, որ ավելի կարևոր են աշխարհի և Եվրոպայի առաջնությունները, քան աշխարհի գավաթը, քանի որ դրանք պետական նշանակություն ունեն: Մարզիչը նշեց, որ կան բազմաթիվ հայազգի մարզիկներ, որոնք հանդես են գալիս այլ երկրների պետական դրոշի ներքո:
Բազկամարտի աշխարհի չեմպիոն, Եվրոպայի եռակի չեմպիոն, աշխարհի գավաթակիր Վլադիմիր Մնացականյանը, հավատալով մեր ընտրանու հաջողությանը, ասաց, որ մեր հավաքականը ներկայացնելու են ուժեղ մարզիկներ, որոնք կարող են գործել թե՛ աջ, թե՛ ձախ ձեռքերով:
Լեհաստանի մայրաքաղաք Վարշավայում սույն թվականի նոյեմբերի 28-ից դեկտեմբերի 4-ը կայանալիք աշխարհի առաջնությունում Հայաստանը կներկայացնի 65 կգ քաշային կարգում հանդես եկող հայազգի մարզիկ Վազգեն Սողոյանը, ով աշխարհի եռակի չեմպիոն է:
Խոսելով առկա խնդիրներց` մարզիչը նշեց, որ չկա համապատասխան մարզագույք, կան մրցավարական խնդիրներ, սակայն հիմնականը մարզադահլիճի հարցն է: Մեր հավաքականում գրեթե բոլոր մարզերից ընդգրկված են մարզիկներ, որոնք մարզվում են տեղի մարզադահլիճներում, իսկ խոշոր մրցաշարերից առաջ հավաքները կազմակերպվում են «Պոլիտեխնիկ» մարզական ակումբում:
Խնդիր է նաև այն, որ, ի տարբերություն այլ երկրների, մենք չունենք բազկամարտի կանանց հավաքական, որը միջազգային մրցաշարերի մեդալների ընդհանուր հաշվարկում մեր ընտրանու զբաղեցրած անհամապատասխան տեղերի պատճառ է հանդիսանում: