«Առաջին լրատվական»-ին հայտնի է դարձել, որ հոկտեմբերի 28-ին Բեռլինում աշխատանքային այցով գտնվող արտգործնախարար Էդվարդ Նալբանդյանը հանդիպել է Գերմանիայի արտաքին գործերի նախարար Գիդո Վեստերվելլեի հետ:
Ողջունելով Էդվարդ Նալբանդյանին` Գերմանիայի ԱԳ նախարարը շնորհավորել է նրան Հայաստանի անկախության քսանամյակի կապակցությամբ՝ նշելով, որ այդ ժամանակահատվածում հայ-գերմանական հարաբերությունները լավ զարգացում են ապրել:
Նախարար Նալբանդյանը, շնորհակալություն հայտնելով Բեռլին այցելելու հրավերի և ջերմ ընդունելության համար, ասաց. «Հայաստանը մեծապես կարևորում է Գերմանիայի հետ համագործակցության առավել խորացումը ու ամրապնդումը, և դրա վկայությունն են համատեղ իրականացվող բազմաթիվ ծրագրերը, երկկողմ փոխգործակցությունը ամենատարբեր ոլորտներում»:
Հայ-գերմանական հարաբերություններին բնորոշ կառուցողական և ջերմ մթնոլորտում անցած հանդիպման ընթացքում երկու երկրների արտաքին քաղաքական գերատեսչությունների ղեկավարներն անդրադարձել են Հայաստանի նախագահի և Գերմանիայի կանցլերի միջև ձեռք բերված պայմանավորվածությունների կատարման ընթացքին:
Էդվարդ Նալբանդյանն ու Գիդո Վեստերվելլեն քննարկել են երկկողմ օրակարգի հարցերի լայն շրջանակ՝ բարձրաստիճան այցելությունների կազմակերպում, տնտեսական համագործակցության խթանման նպատակով իրավապայմանագրային դաշտի ընդլայնում, Հայաստան-Եվրոպական Միություն համագործակցություն, միջազգային և տարածաշրջանային հարցեր:
Հայաստանի և Գերմանիայի արտգործնախարարներն անդրադարձել են ֆինանսական ճգնաժամին դիմակայելու ուղղությամբ Եվրոպական միության ջանքերին, Միջին Արևելքում տեղի ունեցող իրադարձություններին, մտքեր են փոխանակել մեր տարածաշրջանում անվտանգության և կայունությանն ամրապնդմանն առնչվող խնդիրներին շուրջ:
Նախարարներն անդրադարձել են Հայաստան–ԵՄ հարաբերություններին, Ասոցացման համաձայնագրի շուրջ ընթացող բանակցություններին, մուտքի արտոնագրային ռեժիմի դյուրացմանը, ազատ և համապարփակ առևտրի գոտու ստեղծմանն առնչվող հարցերին:
Խոսելով Հայաստանում իրականացվող ժողովրդավարական բարեփոխումների մասին` Գերմանիայի ԱԳ նախարարը նշել է, որ այդ ոլորտում առաջընթացը տեսանելի է:
Առևտրատնտեսական հարաբերությունների ընդլայնման շուրջ քննարկումների համատեքստում, նախարար Նալբանդյանը նշել է, որ Հայաստանում գործում են գերմանական կապիտալով շուրջ ութ տասնյակ ընկերություն, և հույս է հայտնել, որ համատեղ ջանքերով դրանց թիվը մոտակա տարիներին կարող է կրկնապատկվել:
Նախարար Նալբանդյանը տեղեկացրել է արցախյան հիմնախնդրի կարգավորման բանակցություններում վերջին զարգացումների մասին: Այս առումով նախարար Վեստերվելլեն Գերմանիայի աջակցությունն է հայտնել Մինսկի խմբի համանախագահության ներքո ընթացող բանակցային գործընթացին՝ ընդգծելով խնդրի խաղաղ կարգավորման այլընտրանքի բացակայությունը:
Գերմանիայի արտգործնախարարը ներկայացրել է Իրանի միջուկային ծրագրի վերաբերյալ ԵՄ դիրքորոշումը, ինչի կապակցությամբ Էդվարդ Նալբանդյանն ընդգծել է, որ Հայաստանը հուսով է, որ Իրանի միջուկային ծրագրի շուրջ լուծումներ և համաձայնություններ կգտնվեն բանակցությունների միջոցով` Իրանի և միջազգային հանրության համատեղ ջանքերով:
Հայ-թուրքական հարաբերությունների կարգավորման վերաբերյալ քննարկման ժամանակ նախարար Վեստերվելլեն նշել է, որ Գերմանիան աջակից է Հայաստանի և Թուրքիայի միջև բնականոն հարաբերությունների հաստատման ջանքերին:
Գիդո Վեստերվելլեն ընդունել է Էդվարդ Նալբանդյանի Երևան այցելելու հրավերը, և պայմանավորվածություն է ձեռք բերվել այդ այցելությունն իրականացնել հաջորդ տարվա առաջին կեսին:
Օրվա երկրորդ կեսին Էդվարդ Նալբանդյանը հանդիպել է նաև կանցլեր Անգելա Մերկելի արտաքին քաղաքականության և անվտանգության հարցերով գլխավոր խորհրդական Քրիստոֆ Հոյսգենի հետ:
Զրուցակիցները քննարկել են հայ-գերմանական բարեկամական հարաբերությունների առավել ամրապնդման ուղիները, միջազգային և տարածաշրջանային խնդիրների լայն շրջանակ:
Նույն օրը Հայաստանի արտգործնախարարն ուղևորվել է Փարիզ, որտեղ այսօր` հոկտեմբերի 29-ին, նախատեսված է նրա ելույթը ՅՈՒՆԵՍԿՕ-ի 36-րդ գլխավոր համաժողովին:
