Հայաստանը քաղաքական և տնտեսական բազմաթիվ թելերով կապված է Ռուսաստանի հետ: Վերջին օրերին ավելացավ ևս մեկը՝ Ազատ առևտրի գոտու պայմանագիրը, այժմ էլ լուրեր են տարածվել, որ Ռուսաստանը համաձայնել է Հայաստանին 400 մլն դոլարի վարկ հատկացնել ԵվրԱզԷՍ հիմնադրամից «Նաիրիտ» գործարանի գազաքիմիական մասնաճյուղի արդիականացման համար: ՌԴ վարչապետ Վլադիմիր Պուտինը ընտրություններից առաջ «արդյունքներ ցույց տալու» խնդիր ունի, իսկ ՀՀ վարչապետ Տիգրան Սարգսյանը, ըստ համառ լուրերի, անձնական շահ ունի «Նաիրիտի» վերագործարկման հարցում:
Թե որքանո՞վ Ազատ առևտրի գոտու պայմանագրի կնքումը և «Նաիրիտին» 400 մլն դոլարի վարկ հատկացնելը կապ ունեն մեկը մյուսի հետ, «Առաջին լրատվական»-ը խնդրեց մեկնաբանել ՀՀ նախկին վարչապետ Հրանտ Բագրատյանին: Նրա խոսքով՝ բոլորովին էական չէ, թե այդ 2 իրադարձությունների միջև ինչ կապ կա: Ըստ Հ.Բագրատյանի՝ առավել կարևոր է, թե ինչո՞ւ է մասնավոր «Նաիրիտի» համար պետությունը պետական պարտք վերցնում:
«Մասնավոր գործարան է, իբր թե՝ վաճառված: Ո՞վ է դրա սեփականատերը, այդ մասնավոր անձի համար մենք ինչո՞ւ ենք որպես պետություն 400 մլն պարտք վերցնում: Ինչո՞ւ ենք հանրապետության պարտքը 15%-ով ավելացնում հանուն մասնավոր ընկերության»,- ասաց Հ.Բագրատյանը՝ նշելով, որ այդ ընկերությունն, ասում էին, վարչապետինն է, հետո հերքեցին. «Ասենք՝ Պողոսինը կամ Պետրոսինն է, բայց ինչի՞ ենք մասնավորի համար պետական պարտք վերցնում: Ինչո՞ւ Պետրոսը չի վերցնում»:
Հ.Բագրատյանը փաստեց, որ այսօր միջազգային կառույցները, մասնավորապես՝ ԱՄՀ-ն և ՀԲ-ն, իրենք են շահագրգռված վարկեր տալ, և վարկ վերցնելը բոլորովին խնդիր չի:
«Ե՞րբ դարձավ այդ գործարանը մասնավոր: Ատոմակայանի հետ միասին որպես պետական ձեռնարկություն ես վերագործարկեցի, և դա շահութաբեր աշխատում էր»,- ասաց Հ.Բագրատյանը:
