«Այդ դեպքերի առնչությամբ որևէ դիմում Մարդու իրավունքների պաշտպանի գրասենյակը չի ստացել և ՄԻՊ-ը, առանց դիմում ստանալու և դա ուսումնասիրելու, չի կարող որևէ մեկնաբանություն անել»,- պատասխանելով «Առաջին լրատվական»-ի հարցին, թե ինչպես է վերաբերում «Բանակն իրականում» նախաձեռնության ակտիվիստներ Վարդգես Գասպարիին և Լալա Ասլիկյանին բողոքի ակցիային մասնակցելու համար բերման ենթարկելուն, կարծիք հայտնեց Մարդու իրավունքների պաշտպան Կարեն Անդրեասյանը:
Նա նկատեց, որ, որպես ՄԻՊ, ինքը միայն կարող է ասել, որ խաղաղ ցուցարարների նկատմամբ չի կարելի բռնություն կիրառել, եթե իրենք կարգն ու օրենքը չեն խախտել:
Նշենք, որ երեկ ոստիկանապետ Ալիկ Սարգսյանը հայտարարել էր, թե բողոքի ակցիաները արգելել է, որովհետև ակցիայի մասնակիցները վիրավորում են կառավարության ներկայացուցիչներին, և քաղաքացիներին կոչ էր արել իրենց հարցերով գնալ նախարարների մոտ ընդունելության:
Կարեն Անդրեասյանը նշեց, որ ոստիկանապետի ասածները ինքը չի ցանկանում մեկնաբանել, բայց ակնհայտ է մի բան, որ եթե բողոքի ակցիան իրավաչափ է, և քանի դեռ ակցիայի մասնակիցը չի արել ապացուցված ապօրինություն, ապա չի կարող լինել որևէ պատասխանատվություն կամ բռնություն ակցիայի մասնակցի նկատմամբ:
Անդրեասյանը նշեց, որ բողոքի ակցիաները հենց նրա համար են, որ շեղեն, անհանգստացնեն պատկան մարմիններին. «Ակցիաները նրա համար չեն, որ փափուկ, հանդարտ, որևէ մեկին նեղություն չտալով անցնեն: Եվ հասարակությունը, և պաշտոնյաները պետք է հասկանան, որ ակցիաները հենց անհանգստություն պետք է պատճառեն և ուշադրություն հրավիրեն բարձրացված խնդրին»:
Մարդու իրավունքների պաշտպանը կոչ արեց պետական պաշտոնյաներին լսել և արագ հասկանալ, թե ինչ խնդիր է բարձրացնում ակցիան կազմակերպողը, իսկ ակցիա կազմակերպողներին խորհուրդ տվեց չօգտվել ընդհանուր ազատության գաղափարից և չշարաշահել այն:
