«Մենք նույնիսկ չենք էլ պատրաստվում ներողություն խնդրել Թուրքիայից»,- ասել է Իսրայելի փոխվարչապետ Սիլվան Շալոմը` պատասխանելով այն հարցին, թե արդյոք Իսրայելը պատրաստվո՞ւմ է Թուրքիայի վարչապետ Ռեջեփ Թայիփ Էրդողանի պահանջով ներողություն խնդրել «Խաղաղության նավատորմի» վրա հարձակման համար: Ինքը` Էրդողանը, ըստ փոխվարչապետի, պետք է ներողություն խնդրի «Գազայի հատվածում սիոնիստների վայրագություններ» արտահայտության համար: Այս մասին հայտնում է իսրայելական Cursor կայքը:
«Մենք ոչ մի պատճառ չունենք՝ ներողություն խնդրելու թուրքերից: Ընդհակառակը, այդ նրանք պետք է ներողություն խնդրեն այն սադրանքի համար, որ կազմակերպեցին` «խաղաղության նավատորմի» հետ կապված»,- ավելացրել է Շալոմը:
Կայքը հիշեցնում է, որ, չնայած մի քանի օր առաջ Իսրայելին ցուցաբերած օգնությանը, Թուրքիայի վարչապետը նշել է, որ սիոնիստները դեռ պետք է պատասխան տան Գազայի հատվածի վայրագությունների համար: Նա նշել էր, որ իրենց օգնությունը զուտ հումանիտար է և ոչ մի կապ չունի առաջացած քաղաքական ճգնաժամի հետ: Բայց, միևնույն ժամանակ, վարչապետը ցավակցություն էր հայտնել հրդեհների պատճառով զոհվածների ընտանիքներին: