Հայաստանի Ռամկավար ազատական կուսակցությունը կարծում է, թե շատ լավ է, որ Ադրբեջանը դարձել է ՄԱԿ Անվտանգության խորհրդի ժամանակավոր անդամ և Հայաստանի պայքարը նրա դեմ կիրականացվի հենց ՄԱԿ-ի` ցեղասպանության մասին ընդունած կոնվենցիաներով, որոնք ընդունել է նաև Ադրբեջանը: Այսօր կայացած մամուլի ասուլիսի ժամանակ նման տեսակետ հայտնեց ՀՌԱԿ ատենապետ Հարություն Առաքելյանը:
«Ադրբեջանը իր այս կարգավիճակով նույնիսկ ավելի կաշկանդված կլինի: Նա հայտնվել է թակարդում, և մենք պետք է օգտվենք դրանից: Ժամանակն է մարդկության, մասնավորապես հայ բնակչության հանդեպ կատարած նրա հանցանքի դեմ հայց ունենալ: Մենք Ադրբեջանի հետ, բացի ԵԱՀԿ Մինսկի կանոնադրությունից, այսուհետ պետք է խոսենք նաև ՄԱԿ-ի իսկ կանոնադրությամբ: Հատկանաշական է, որ Ադրբեջանի` ՄԱԿ ԱԽ-ի ժամանակավոր անդամ ընտրվելու հարցում մեծ դեր ունեցան իսլամական պետությունները: Ադրբեջանն այդ պաշտոնում ընտրվեց նաև կառույցի մշտական անդամ հանդիսացող ԵԱՀԿ Մինսկի խմբի երեք համանախագահող երկրների թողտվությամբ»,- նկատեց նա:
Առաքելյանի խոսքով, կուսակցությունը 131 պատգամավորներին նույն թվով նամակներ է ուղարկել` կոչ անելով անհապաղ «1988-1994 թվականների ադրբեջանական իշխանությունների կողմից հայ ազգի հանդեպ իրականացրած ցեղասպանության» մասին օրենք ընդունել: «Վաղուց հասունացել է պահը, երբ Ադրբեջանում իննսունականներին հայերի հանդեպ իրականացվածը պետք է ցեղասպանություն որակել: ՀՀ Ազգային ժողովը պետք է համապատախան օրենք ընդունի»:
ՀՌԱԿ ատենապետը նաև տեղեկացրեց, որ իրենք լիովին գիտակցում են`քաղաքական դաշտի ներկայիս իրավիճակում միայնակ հանդես գալը շատ բարդ է: «Եթե անգամ քաղաքական որևէ ուժի հետ միասին հանդես գալու որոշում կայացնենք, ուշադրություն ենք դարձնելու այդ ուժի գաղափարախոսությանը, սակայն քաղաքական այս կամ այն ուժի հետ միությունը կոլեգիալ որոշման հարց է: ՀԱԿ-ից մինչև ՀՀԿ ոչ ոքի հետ հակասություններ ու թշնամանք չունենք, այնպես որ, ոչ մի բան չեմ բացառում: Չեմ բացառում նաև, որ ազգային բլոկ ստեղծվի, հնարավոր է՝ Ռոբերտ Քոչարյանն իր բլոկը ձևավորի»,- նկատեց ՀՌԱԿ ատենապետը:
