Ամերիկացի պաստոր Թերի Ջոնսը, որը հայտնի է դարձելՂուրանի հրապարակային այրումից հետո, պատրաստվում է իր թեկնածությունն առաջադրել ԱՄՆ նախագահական ընտրություններին:
Ինչպես հաղորդում է ABC News-ը, Ջոնսը նաև հայտնել է, որ կպաշտպաներ Հերման Քեյնի թեկնածությունը:
«Կարծում եմ, որ Հերման Քեյնը հիանալի նախագահ կլինի,- ասել է Ջոնսը:- Ես միանշանակ Քեյնին կընտրեի: Նա շատ խիզախ է և ի վիճակի է ճիշտ խոսել ամերիկացի ժողովրդի հետ: Բայց մի մոռացեք, ես նույնպես պատրաստվում եմ ընտրություններին»:
Հիշեցնենք, մարտի կեսերին Ֆլորիդայում Թերի Ջոնսը հրապարակավ այրել էր Ղուրանի կրկնօրինակը, ինչը անկարգությունների տեղիք էր տվել Աֆղանստանում:
Ջոնսը, սակայն, հայտարարել է, թե, որպես նախագահ, ինքը Ղուրաններ չի այրի Սպիտակ տանը: Նա նաև իր պատրաստակամությունն է հայտնել «դիմակայել շարիաթի օրենքներին և ծայրահեղ մուսուլմաններին» ու հանդես գալ «բոլոր անօրինական ներգաղթյալների վտարման» օգտին:
Ջոնսի խոսքերով` ինքն արդեն անհրաժեշտ չափով գումար հավաքել է նախընտրական քարոզարշավի համար:
