«Հազարամյակի մարտահրավերներ ծրագիրը, որ գործում է արդեն 7 տարի, ԱՄՆ կառավարության այլ հիմնադրամներից տարբերվում է նրանով, որ մեծ ուշադրություն է դարձնում կատարված ծրագրերի արդյունքների վրա: Այսինքն` հետևում ենք ոչ միայն ծրագրի իրականացմանը, այլև դրա բերած բարելավումների գնահատմանը»,- ՀՄՀ հերթական պրեզենտացիայի ժամանակ ասաց ՀՄՀ մոնիթորինգի և գնահատման գծով տնօրեն Ռեբեկա Թանսթակը: ՀՄՀ հերթական պրեզենտացիան ամփոփում էր Երրորդ կարգի ջրանցքների հետազոտության արդյունքները, որոնք չափելու համար օգտագործվել են Մաթեմաթիքս Փոլիսի Րիսրչ ընկերության մեթոդները, իսկ հարցումներն իրականացրել է տեղական «Արեգ» ՀԿ-ն: Առաջինը ելույթ ունեցավ ՄԳ ղեկավար Լուսինե Խառատյանը և ներկայացրեց հետազոտության սկզբունքները. «Արդյունքները հաշվելու համար համեմատել ենք վիճակը միևնույն աշխարհագրական, կլիմայական և այլ ցուցանիշներ ունեցող 2 խմբի գյուղերում` ա) որտեղ շինարարություն կարարվել է և բ) որտեղ չի կատարվել»: Ըստ «Արեգ» ՀԿ-ի ղեկավար Աիդա Բաբլոյանի՝ հարցումներ կատարվել են 98 ծրագրային և 77 համեմատական համայնքներում, և դրանց մասնակցել է 2997 գյուղացի: Վերջին պրեզենտացիան ներկայացնում էր ստույգ թվեր` հիմնական արդյունքները: Հեղինակ Քենեթ Ֆորթսոնը ներկայացրեց հաշվարկների ամբողջ ընթացքը և, ի վերջո, հրապարակեց իրենց եզրակացությունը` ծրագրային խմբի գյուղացու միջին եկամուտը կազմում է 1.492.920 դրամ: Ահա այստեղ ներկա գյուղապետերը չդիմացան: «Եթե որևէ գյուղացի 1.492.920 դրամ եկամուտ ստանա, այևս հող չի մշակի և չի լքի իր հայրենիքը»,- ընդհատեց Էջմիածնի Վաղարշապատ գյուղի գյուղապես Սուրիկ Սեդրակյանը: Ըստ նրա՝ այդ թիվը 3 անգամ գերազանցում է իրական միջին եկամուտը, իսկ տնտեսական անկումը, համաձայն ՀՀ կառավարության տվյալների, 9% է և ոչ թե 2%: Ծրագիր իրականացնողները մերժեցին Սեդրակյանի խնդրանքը` տալ հարցվածներից մեկի անունը, ով նման եկամուտ է ստանում՝ ասելով, որ անունները խիստ գաղտնի են պահվում: ՄԳ ղեկավար Լ. Խառատյանը փորձեց մեղմել սրահում թեժացող լարվածությունը` հարցնելով, թե արդյոք բոլոր գյուղապետե՞րն են կիսում Սեդրակյանի կարծիքը: Հարցին ներկաները միաձայն պատասխանեցին՝ «այո՛»: Էջմիածնի մեկ այլ գյուղապետ՝ Լ. Սարգսյանը, միացավ գործընկերոջը՝ ասելով. «Իրենց ասածը հետազոտություն չէ, այլ բարի ցանկություն»:
«Հարցն այն չէ, որ սխալ թվեր են ներկայացնում: Իմ մտահոգությունն այն է, որ մի քանի տարի հետո կասեն 2 մլն եկամուտ եք ստանում` 150.000 ջրի վարձ տվեք»,- խոսքն ավարտեց Ս. Սեդրակյանը:
