ԿԸՀ անդամ Զոյա Թադեւոսյանը, պատասխանելով լրագրողների հարցին, նշել է, թե ցանկալի է անցկացնել ՀՀ նախագահի եւ Ազգային ժողովի արտահերթ ընտրություններ: «Հակառակ դեպքում անդառնալի կորուստներ կունենանք, հակառակ դեպքում կկորցնենք մեր պետականությունը», – ընդգծել է նա: Նրա կարծիքով, ընտրական օրենսգրքի բարեփոխումներն օգուտ չեն տա, պետք է դրսեւորել քաղաքական կամք` ազատ, թափանցիկ ընտրություններ անցկացնելու համար: «Այն օրենսգիրքը, որ գործում է, իրականում բավարար է արդար ընտրություններ անցկացնելու համար», – նշել է նա, ապա հավելել, որ ընտրակեղծիքների դիմում են հիմնականում թաղապետարանի աշխատակիցները, որոնք պատրաստ են ծառայություններ մատուցելու իշխանություններին: Որպես արդար ընտրությունների անցկացման նախապայման` ընտրական հանձնաժողովները, ըստ ԿԸՀ անդամի, պետք է ձեւավորվեն պետության պատասխանատվությամբ, որում հավասար ներգրավվածություն պետք է ունենա նաեւ ընդդիմությունը` որպես հակակշիռ: Մյուս կողմից` նա կարծում է, որ վստահված անձինք պետք է ունենան անձեռնմխելիություն եւ իրավունք ստանան ստորագրելու վերջնական արձանագրությունների տակ: Նա հիշեցրեց, որ նախկինում ընտրակեղծիքների մեղքը գցում էին կուսակցությունների վրա եւ այդ փոփոխություններով ուզում են վերականգնել նախկին համակարգը: «Կարծում եմ` կուսակցությունները պետք է մերժեն այս մոտեցումը: Կուսակցությունները նման խաղի մեջ մտնելու իրավունք չունեն: Հակառակ դեպքում` հասարակության մեջ կամրագրվի այն գաղափարը, որ կուսակցություններն են զբաղված ընտրակեղծիքներով», – ասել է ԿԸՀ անդամը: