ՆԱՏՕ-ն հաստատել է, որ գալիք տարվա մայիսին Չիկագոյում կայանալիք գագաթնաժողովի ժամանակ կներկայացնի հակահրթիռային պաշտպանության վերաբերյալ իր տեսակետը: Ինչպես հաղորդում է РИА Новости-ն, այս մասին Մոսկվայում կայացած մամլո ասուլիսի ժամանակ հայտնել է Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապպատուրայը:
Ալյանսը բազմիցս քննարկել է ընդհանուր հակահրթիռային պաշտպանություն ստեղծելու հնարավորությունները, սակայն դեռևս չի եղել միաձայն կարծիք այն մասին, թե ինչպես պետք է լինի այդ պաշտպանությունը:
Ինչ վերաբերում է ՆԱՏՕ-ի և Ռուսաստանի հարաբերություններին, ապա Ջեյմս Ապպատուրայը հայտարարել է, որ իրենք չեն ուզում, որպեսզի այս հարցը խոչընդոտ դառնա իրենց համար և բացասական անդրադառնա հարաբերությունների վրա:
Հիշեցնենք, որ ԱՄՆ համապատասխան մարմինները բազմիցս հայտարարել են, որ հակահրթիռային պաշտպանությունն ուղղված չէ Ռուսաստանի դեմ, և այս ոլորտում համագործակցությունը բխում է թե՛ ԱՄՆ-ի, թե՛ ՆԱՏՕ-ի, թե՛ Ռուսաստանի շահերից: