Լրագրողների հետ հանդիպման ժամանակ ՀՅԴ Գերագույն մարմնի անդամ Արմեն Ռուստամյանը տեղեկացրեց, որ ՀՅԴ վաղվա «Ժողովրդավարության մարտահրավերներ» խորհրդաժողովը նվիրվելու է ժողովրդավարության մարտահրավերներին: Ռուստամյանը նշեց, որ խորհրդաժողովի ընթացքում կգնահատվի երկրում ստեղծված իրավիճակը, և կխոսեն ժողովրդավարության հետ կապված ՀՅԴ անելիքներից. «Երկիրը պետք է զարգանա չզիջելով: Մեր կարծիքով, հենց չզիջելու համար զարգանալը կարևոր նշանակություն ունի: Դրա կարևոր բաղադրիչը համաժողովրդական ներուժի կուտակումն է և արդյունավետ օգտագործումը, որի պարագայում մենք կարող ենք իսկապես զարգացման լուրջ կարողություն ձեռք բերել»: Ռուստամյանի գնահատմամբ՝ պետությունը պետք է լինի ազգային, իշխանությունները` ժողովրդավարական, իսկ նման միջավայր Հայաստանում չկա՝ և խնդիրը հենց այդ միջավայրը ձևավորելն է:
Անդրադառնալով ժողովրդավարության կարևորագույն տարրերին՝ Արմեն Ռուստամյանը կարծիք հայտնեց, որ ներկայացուցչական ժողովրդավարությունը մեր երկրում ապահովված չէ. «Ներկայացուցչական ժողովրդավարությունը խորհրդարանն է, իսկ մեր խորհրդարանը չի ներկայացնում երկրում առկա իրական իրավիճակը: Խորհրդարանը ոչ թե թույլ է, այլ պարզապես անկարող է գործադիր իշխանության նկատմամբ: Եթե տեսնենք, թե որքան օրենսդրական նախաձեռնություններ են ծնվում ԱԺ-ում, և որքանն է բերվում կառավարությունից, համամասնությունը մեկը տասի է: Այսօրվա խորհրդարանի պատգամավորների միայն 25-30 տոկոսն է զբաղվում օրենսդրական և քաղաքական գործունեությամբ, իսկ սա խայտառակ ցուցանիշ է»:
Ռուստամյանի կարծիքով, այդ ամենը կանխելու համար պետք է ձևավորվի խորհրդարանական համակարգ, որտեղ, սակայն, չեն լինի անձեռնմխելիության մեխանիզմներ, ինչպես նաև ժողովուրդը հնարավորություն կունենա հետ կանչելու իրեն չարդարացրած պատգամավորին:
Մասնակցային ժողովրդավարության մասին խոսելիս՝ Ռուստամյանը կարծիք հայտնեց, որ նման բան Հայաստանում չկա. «Մեզանում ժողովրդավարությունը դարձել է ընդհատված պրոցես, և ժողովրդի մասնակցությունը երևում է ընտրությունից ընտրություն»:
