Վաղն առավոտյան «Պահպանենք Թռչկանի ջրվեժը» քաղաքացիական նախաձեռնության անդամ մի քանի բնապահպաններ հանդիպում կունենան բնապահպանության նախարարությունում` քննարկելու Թռչկանի ջրվեժի հետագա ճակատագիրը. այսօր լրագրողների հետ հանդիպման ժամանակ տեղեկացրեց իրավաբան Մերի Խաչատրյանը` հավելելով, որ պահպանելու են իրենց դիրքորոշումը և պահանջելու ջրվեժի վրա կառւցվելիք հէկի շինարարական աշխատանքների անհապաղ դադարեցում:
Իրավաբանը նաև ասաց, որ հէկի կառուցող «Ռոբշին» ընկերությունը շատ թույլտվություններ անհասկանալի պայմաններում է ձեռք բերել: Դրանցից մեկը, Մ. Խաչատրյանի փաստմամբ, այն է, որ տեղի է ունեցել հանրային քննարկում, որին մասնակցել է ընդամենը յոթ անձ: «Ինչպես կարելի էր մասնագիտական, այն էլ՝ դրական եզրակացություն տալ հէկի կառուցման վերաբերյալ»,- նշեց Մ. Խաչատրյանը` հավելելով, որ իրավունք չկա գործունեություն ծավալել բնության հուշարձանի տարածքում, ուստի պետք է չեղյալ համարել «Ռոբշին»-ին տրված բոլոր թույլտվությունները:
«Պահպանենք Թռչկնի ջրվեժը» նախաձեռնության անդամները պայքարելու են այնքան ժամանակ մինչև վերջնականապես դադարեցվեն հէկի կառուցման աշխատանքները: Թռչկան վերջին այցելության ժամանակ բնապահպանները կարողացել են դադարեցնել շինարարական աշխատանքները և վաղվանից վրանային ճամբար են կառուցելու ջրվեժի շրջակայքում՝ ապացուցելու, որ ջրվեժի լիիրավ տերն են: Երիտասարդները հորդորում են շահագրգիռ անձանց միանալ իրենց ակցիաներին՝ կազմակերպել համերգներ, արշավներ և այլ միջոցառումներ`ի պաշտպանություն Թռչկանի ջրվեժի: «Մենք պետք է ոչ միայն Թռչկանը, այլև բոլոր հուշարձանները փրկենք այն մարդկանցից, ովքեր մտածում են միայն եկամուտի մասին»,- ընդգծեց Եղիա Ներսիսյանը` առաջարկելով եկամուտի այլ տարբերակ. Թռչկանը զարգացնել որպես տուրիզմի կենտրոն:
Հիշեցնենք, որ «Պահպանենք Թռչկանի ջրվեժը» նախաձեռնության անդամները պայքարում են Հայաստանի բնաշխարհի ամենագեղեցիկ և ջրառատ ջրվեժի՝ Թռչկանի վրա կառուցվելիք հէկի շինարարական աշխատանքները դադարեցնելու համար, քանի որ այն երկու անգամ ճանաչվել է բնության ջրագրական հուշարձան: Բնապահպանների համոզմամբ` հէկը ամբողջությամբ կսպանի և կոչնչացնի ջրվեժի գեղեցկությունն ու ջրառատությունը:
