Հայ ազգային կոնգրեսի համակարգող Լևոն Զուրաբյանը մամուլի ասուլիսի ժամանակ հայտարարեց. «Աստանայում կայացած ԵԱՀԿ գագաթնաժողովի շրջանակներում Լեռնային Ղարաբաղի հակամարտության կարգավորման վերաբերյալ Մինսկի խմբի համանախագահների և Հայաստանի ու Ադրբեջանի նախագահների կողմից ստորագրած հայտարարությունը վերահաստատում է Աքվիլայում հաստատած կարգավորման սկզբունքները և հակամարտող կողմերի պարտավորությունը` լուծել ԼՂ հարցը այդ սկզբունքների հիման վրա »: Ըստ ՀԱԿ համակարգողի` այդ հայտարարությունն ապացուցում է Սերժ Սարգսյանի դիվանագիտական նահանջները: Լևոն Զուրաբյանը թվարկեց այն բոլոր կործանարար նահանջները, որոնք արձանագրվել են Սերժ Սարգսյանի պաշտոնավարման երկու տարիների ընթացքում: Ըստ Լ. Զուրաբյանի`ԵԱՀԿ համանախագահող երկրների համանախագահների հայտարարություններից երևում է, որ ԼՂ-ն դադարել է լինել բանակցությունների իրավահավասար կողմ և մասնակից: Սրանից զատ, համաձայնելով ժողովուրդների ինքնորոշման և տարածքային ամբողջականության սկզբունքների համատեղմանը, Հայաստանը պաշտոնապես իր համաձայնությունն է տվել, որ ԼՂ հակամարտության կարգավորումը տեղի ունենա Ադրբեջանի տարածքային ամբողջականության շրջանակներում: ՀԱԿ համակարգողը նշեց, որ ԼՂ խնդրին վերաբերող հայտարարության մեջ նշվում է կամարտահայտման մասին, որն անորոշ սկզբունք է: ՀԱԿ-ին մտահոգում է նաև ԼՂ-ի և ՀՀ-ի միջև ցամաքային կապի մասին ձևակերպումները: Լ. Զուրաբյանը մտահոգություն հնչեցրեց, որ ազատագրված տարածքները կարող են անցնել Ադրբեջանի վերահսկողության ներքո, իսկ ադրբեջանցի փախստականները կարող են վերադառնալ Լեռնային Ղարաբաղ: ՀԱԿ համակարգողը հիշեցրեց, որ ժամանակն աշխատում է Ադրբեջանի օգտին, և անգամ Հայաստանի կողմից այսպիսի նահանջներից հետո էլ Ալիևի ախորժակը մեծանում է: