Դեկտեմբերի 3-ին Սարատովում ձերբակալվել է 44-ամյա օրենքով գող Թենգիզ Օզմանովը, որը քրեական աշխարհում առավել հայտնի է Դաթո-Կուվալդա մականունով: Նրան կասկածում են մի խումբ անձանց կողմից հանցավոր համաձայնությամբ զենքի և զինամթերքի անօրինական ձեռքբերման և պահման մեջ:
Քննիչները ենթադրում են, որ օրենքով գողը կապ ունի զենքի թաքստոցի հետ, որը հայտնաբերվել է նոյեմբերի 25-ին Էնգելսկում, սեփական տներից մեկի բակում: Թաքստոցում ընդհանուր առմամբ գտնվել է երկու Կալաշնիկով մակնիշի ավտոմատ, երեք պահունակ, երկու 200-գրամանոց տրոտիլային պայթուցիչ, օպտիկական նշանադիր, 22 նռնակ, մեկ ատրճանակ-գնդացիր, երկու ТОЗ-8 հրացան և այլն:
Ըստ հետաքննության վարկածի` գտնված զինանոցը կարող է պատկանել հանցավոր խմբավորմանը, որի անդամ է նաև Էնգելսկի շրջանի գործող ղեկավար Միխայիլ Լիսենկոն: Վերջինիս ձերբակալել են նոյեմբերի 27-ին այդ խմբավորման տասը ակտիվ անդամների հետ միասին: Երեկ պաշտոնյային մեղադրանք է առաջադրվել նաև Բալաշ մականունով օրենքով գող Նիկոլայ Բալաշովի սպանության կասկածանքով: Սպանությունը տեղի էր ունեցել 1998 թ. նոյեմբերի 5-ին: Ավելի վաղ Բալաշի սպանության մեջ մեղադրվում էր հենց Օզմանովը, որը սպանվածի հետ լարված հարաբերությունների մեջ էր: «Прайм Крайм» գործակալության տվյալներով` Թբիլիսիում ծնված եզդի Թենգիզ Օզմանովը Էնգելսկում բնակություն է հաստատել 1992 թ. բանտից ազատվելուց հետո: Վոլգայի ափին գտնվող այդ քաղաքում Օզմանովը հայտնվել է շնորհիվ մեկ այլ եզդու` օրենքով գող Խուդո Հասոյանի (Худо Саратовский): Էնգելսկում «նայողի» թափուր տեղը ի հայտ է եկել տեղի գող Վլադիմիր Անուդինովի մահից հետո:
