Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում Հայ ազգային կոնգրեսի ակտիվիստներ Սարգիս Գևորգյանի և Դավիթ Քիրամիջյանի գործով մեղադրական ճառով հանդես եկավ դատախազ Հարություն Հարությունյանը: Նա նշեց, թե լիովին ապացուցվել է երիտասարդներին առաջադրված մեղադրանքը և տրվել է ճիշտ քրեաիրավական գնահատական: Որպես ապացույց դատախազը վկայակոչեց դեպքի օրն արված տեսագրությունը:
Հարություն Հարությունյանը պահանջեց 3 տարվա ազատազրկում, սակայն հաշվի առնելով, որ մեղադրյալները երիտասարդ են և առաջին անգամ են ենթարկվում քրեաիրավական պատասխանատվության, միջնորդեց պատիժը պայմանականորեն չկատարել և սահմանել 3 տարվա փորձաշրջան:
Դավիթ Քիրամիջյանը մեզ հետ զրույցում ասաց, թե դատախազի մեղադրական ճառը տրամաբանությունից դուրս էր, քանի որ իրենք որևէ հանցագործություն չեն կատարել:
Պաշտպանական ճառերը կհրապարակվեն դեկտեմբերի 20-ին:
Հիշեցնենք, որ Դավիթ Քիրամիջյանը մեղադրվում է ՀՀ Քրեական օրենսգրքի 258 հոդվածի 3-րդ մասով` «խուլիգանություն», իսկ Սարգիս Գևորգյանը` 316 հոդվածի 1-ին մասով` «իշխանության ներկայացուցչի նկատմամբ բռնություն գործադրելը»:
