Հուլիսի 1-ից Երևանի «Արաբկիր» բժշկական կենտրոնում ներդրված համավճարի ծրագրի արդյունքները ամփոփելով՝ ՀՀ ԱՆ պետական առողջապահական գործակալության ղեկավար Արա Տեր-Գրիգորյանը տեղեկացրեց, որ դեկտեմբերի 1-ից ծրագիրը ներդրվել է նաև «Նաիրի» բժշկական կենտրոնում և Մալայանի ակնաբուժական կլինիկայում: Արա Տեր- Գրիգորյանի խոսքերով, 2011 թվականից համավճարի ծրագիրը կիրառվելու է ՀՀ ողջ տարածքում, սակայն մարզերում մոտեցումը դիֆերենցված է լինելու: Մարզերում պետական մասնակցությունը համավճարի ծրագրին ավելի շատ կլինի, քան Երևանում: Նա վստահեցրեց, որ համավճարը արժանավայել փոխհարաբերություններ է ստեղծելու բժշկի և հիվանդի միջև: Այս ծրագրով հիվանդի համար կանխատեսելի է իր բուժման արժեքը: Տեր-Գրիգորյանի խոսքերով՝ «Արաբկիր» բժշկական կենտրոնում ներդրված համավճարի փորձարարական ծրագիրը դրական արդյունքներ է տվել: «Համավճարի օգնությամբ՝ բժշկի աշխատավարձը այս բուժհիմնարկում տատանվում է 85 հազարից 1 միլիոն 900 հազար դրամի սահմաններում: Շուրջ 30 տոկոս ավելացել են կենսաթոշակային վճարումները, և ավելացել է նաև եկամտահարկ»: Արաբկիր բժշկական կենտրոնի շուրջ 600 հիվանդներից 400-ը վճարել են համավճարը: Արա Տեր-Գրիգորյանը խորհուրդ տվեց իր կոլեգաներին չգայթակղվել, իսկ ազգաբնակչության էլ խորհուրդ տվեց վճարել միայն իրենց բուժման համար և բժշկին շնորհակալություն չհայտնել այլ ձևերով:
