2012 թ. գիտության բյուջեն կավելանա 7 տոկոսով և կկազմի մոտ 10,3 մլրդ դրամ՝ 2011-ի` 9,4 մլրդ-ի դիմաց: Այս մասին այսօր լրագրողներին տեղեկացրեց ՀՀ ԿԳՆ Գիտության պետական կոմիտեի նախագահ Սամվել Հարությունյանը:
Նա նշեց, որ բյուջեի ավելացման գումարների հաշվին մոտ 7 տոկոսով կավելանան աշխատավարձերը, ինչպես նաև հավելյալ գումարներ կուղղվեն միջազգային ծրագրերի խթանմանը:
Հարությունյանը տեղեկացրեց, որ գիտության ոլորտում խիստ կարևոր է մասնավոր բիզնեսի հետ աշխատանքը. «Մինչ այսօր գիտության ոլորտը ֆինանսավորվել է պետության կողմից: Այս տարի առաջին անգամ մենք անցկացրեցինք մրցույթ, որին մասնակցեց նաև մասնավոր հատվածը: Մրցույթին մասնակցել են 43 ինովացիոն ծրագրեր, որոնց մեծ մասը համաֆինանսավորում ունեին մասնավոր հատվածից, ընդ որում՝ ոչ միայն հայկական մասնավոր հատվածից, այլ նաև արտասահմանյան: Եվ այդ ծրագրերից 17-ը ֆինանսավորվեց»:
Նրա գնահատմամաբ՝ հետագայում պետք է մեծացնել մասնավորի հետ համագործակցությունը, քանզի մասնավորի հետ համագործակցությունը էապես խթանում է գիտության զարգացումը: Ըստ Հարությունյանի՝ զարգացած երկրներում պետության կողմից գիտության ոլորտի ֆինանսավորման ծավալը շատ փոքր տոկոս է կազմում. «Որքան մեծ է պետական ֆինանսավորման մասնաբաժինը գիտության ոլորտում, այնքան պետության զարգացման մակարդակը ցածր է»:
Հարությունյանը նաև հավելեց, որ այսօր գիտության բյուջեի 70-75 տոկոսը պետական միջոցներն են, իսկ մնացածը ստացվում է գրանտային ծրագրերի և միջազգային համագործակցության միջոցով: Ըստ Հարությունյանի՝ մի քանի տարի առաջ պետական ֆինանսավորման մասնաբաժինն ավելի մեծ էր, և ի ուրախություն բոլորի, տարեցտարի այն նվազում է:
