Ժամանակավոր անաշխատունակ ճանաչված կանանց նախաձեռնող խումբը այսօր մամուլի ասուլիս էր հրավիրել ` ո՛չ ասելու կառավարության կողմից ընդունված օրենքի 22-րդ հոդվածի 2-րդ կետին, որի համաձայն՝ հղի կանայք ստիպված են հրաժարվել իրենց հասանելիք նպաստներից: Նախաձեռնող խմբի անդամ Տաթևիկ Դավթյանը նշեց, որ օրենքը չի քննարկվել ո՛չ հղիների, ո՛չ հասարակական կազմակերպությունների հետ, իսկ իրենց բողոքներին ի պատասխան նշում են, թե այդ կերպ փորձում են պայքարել խարդախությունների դեմ կամ այդ գումարը նպատակաուղղել ավելի աղքատ խավին,ավելին՝ այդ կանայք ընդամենը 5 տոկոս են կազմում: Տաթևիկ Դավթյանի խոսքերով, Հայաստանի աշխատանքի և սոցիալական հարցերի նախարարությունը կարծում է, որ գումարը վերցնելով՝ մեկ աղքատ խավից ու տալով մեկ այլ աղքատ խավի` վերջ է տալու աղքատությանը: Այնինչ, աղքատությունը ոչ թե վերանալու է, այլ համահարթեցվելու: Իսկ եթե ուզում են պայքարել խարդախությունների դեմ, պետք է պայքարեն կոնկրետ խարդախության դեմ, այլ ոչ թե բոլոր հղիների: Ինչ վերաբերում է 5 տոկոսին, Տաթևիկ Դավթյանը նկատեց, որ եթե այդ 5 տոկոսը հայտարարի , որ իրենք հրաժարվում են երեխա ունենալուց կամ պատրաստվում են մեկնել արտերկիր, արդյոք Հայաստանի ժողովրդավարությունը չի՞ տուժի: Հետևաբար, նրանք պահանջում են այս ամենը կանխելու համար վերականգնել օրենքի նախկին տարբերակը: