«Ժողովրդի իշխանություն» հասարակական-քաղաքացիական նախաձեռնության անդամ Զոյա Թադեւոսյանը մամուլի ասուլիսի ընթացքում անդրադառնալով արտագաղթի թեմային` հայտարարեց, որ վարչապետը պարծենում է, թե տրանսֆերները 25 տոկոսով ավելացել են: «Ուղարկեք ամբողջ հայությանը կամ մեկ միլիոնին Հայաստանից դուրս, եւ այդ տրանսֆերները կավելանան չորս անգամ, տասն անգամ, հարյուր անգամ», – այսպիսի «լուծում» առաջարկեց ընդդիմադիր գործիչը: Նա հիշեցրեց Ֆ. Էնգելսի խոսքերը. «Մարդը ոչինչ չի անում, եթե չի բավարարվում նրա անձնական շահը»: Զոյա Թադեւոսյանը հարց ուղղեց, թե ինչ են անում իշխանությունները ՀՀ յուրաքանչյուր քաղաքացու անձնական շահը բավարարելու համար, որպեսզի հասարակությունը զարգանա: Զ. Թադեւոսյանը հիշեցրեց, որ գերմանացի տնտեսագետ Դ. Էրհարդը հետպատերազմյան Գերմանիայի տնտեսությունը վերականգնելու համար առաջարկել էր սոցիալական շուկայական տնտեսության մոդել, որը տնտեսության զարգացումը կապում է արտադրության աճի հետ: Անդրադառնալով գյուղատնտեսության խնդրին` ընդդիմադիր գործիչը հարց ուղղեց. «Ո՞ւր է այսօր գյուղացին. անպաշտպան, պետությունից մոռացված, չգիտի` ինչպես վարվել: Շուկայական հարաբերությունները ամրագրում են ճորտ գյուղացու վիճակը»:
