Գերմանիայի հատուկ ծառայությունները երկրի տարածքում ձերբակալել են ռուս լրտեսների: Ինչպես հաղորդում է Deutsche Welle-ն, երկրի հատուկ ծառայությունների աշխատակիցները Մարբուրգ և Բալինգեն քաղաքներում ձերբակալել են մի ամուսնական զույգի, որը մեղադրվում է ռուսական հատուկ ծառայությունների օգտին լրտեսություն կատարելու մեջ: Ձերբակալվածները, որոնք ըստ փաստաթղթերի, ծագումով Լատինական Ամերիկայից են և ունեն ավստրիական անձնագրեր, հերքում են իրենց ուղղված մեղադրանքները:
Deutsche Welle-ի տվյալներով` կնոջը ձերբակալել են այն պահին, երբ նա «ընդունում էր կոդավորված ռադիոհաղորդագրություն»:
Թե կոնկրետ ի՞նչ կապ ունեն ձերբակալվածները Ռուսաստանի օգտին լրտեսական գործողությունների հետ՝ չի հաղորդվում:
Հայտնի է, որ տղամարդը ծնվել է Արգենտինայում, կինը՝ Պերուում: Սակայն գերմանական հատուկ ծառայությունների հետաքննության արդյունքում պարզվել է, որ այդ տվյալները իրականությանը չեն համապատասխանում: Ենթադրվում է, որ զույգը Գերմանիայում լրտեսական գործողություններ է իրականացնում ավելի քան 20 տարի:
Պարբերականը գրում է, որ լրտեսները հատուկ ծառայությունների ուշադրության կենտրոնում են հայտնվել այն բանից հետո, երբ անցյալ տարի ռուսական հատուկ ծառայությունների գործակալների ցանց բացահայտնվեց ԱՄՆ-ում:
