«Բարսելոնա»-ի երկրորդ կազմից կրած պարտությունից հետո «Ռուբին»-ի գլխավոր մարզիչ Կուրբան Բերդիևը հայտարարեց, որ իր սաները պարտվեցին թիմին, որին մի քանի տարի անց ամբողջ աշխարհը կճանաչի: Կատալոնացիները հաղթեցին Անդրեու Ֆոնտասի և Վիկտոր Վասկեսի գոլերի շնորհիվ: Երկու ֆուտբոլիստներն էլ առաջին անգամ աչքի ընկան «Բարսա»-ի կազմում: «Մենք դաշտ էինք դուրս եկել օպտիմալ կազմով, բայց շատ դժվար է պայքարել անգամ «Բարսելոնա»-ի երկրորդ թիմի դեմ. այդ երիտասարդները նույն դպրոցն են անցել և ոչնչով չեն զիջում գլխավոր թիմի ֆուտբոլիստներին»:
Իր հերթին կապտանռնագույնների գլխավոր մարզիչ Պեպ Գվարդիոլան շնորհակալություն հայտնեց իր սաներին` ցույց տված կամքի համար: «Հաղթանակը նման պաշտպանություն ունեցող թիմի նկատմամբ, ինչպիսին «Ռուբին»-ն է, այն էլ՝ երկրորդ կազմով, կրկնակի արժեքավոր է: Կարծում եմ, իմ տղաները ցույց տված կամքի համար արժանի են հարգանքի»:
