Նիգերիական ցեղախմբերից մեկի արքան դիմել է Միչիգան նահանգի Դետրոյթի դատարան` ընդդեմ Royal Dutch Shell կորպորացիայի: Կորպորացիայից նա պահանջում է 1 միլիարդ դոլար` որպես այն բանի փոխհատուցում, որ նավթ է լցվել Նիգերիա:
Այս մասին հաղորդում է AFP գործակալությունը` վկայակոչելով ցեղախմբի շահերը ներկայացնող փաստաբանին:
Shell-ը դեռևս հայցադիմումի առնչությամբ մեկնաբանություններ չի արել:
Հայցում արքա Էմերե Գոդվին Բեբե Օկպաբին և օգալե ցեղախմբի ևս 4 առաջնորդներ նշել են, որ Shell-ի գործունեությունը հանգեցրել է շրջակա միջավայրի զանգվածային աղտոտման ու վտանգ է ներկայացնում բնիկների առողջության համար:
Բացի 1 միլիարդանոց փոխհատուցումից` հայցվորները պահանջում են վերացնել նավթի պատճառով աղտոտվածության հետևանքները, հսկողություն սահմանել ջրի և բուսականության վիճակի նկատմամբ:
2011 թ. օգոստոսին Shell-ն ընդունել էր իր մեղավորությունը 2008 թ. Նիգերիա թափված նավթի կապակցությամբ:
Հաղորդվում էր, որ կորպորացիային սպառնում է մի քանի հարյուր միլիոն դոլարների տուգանք: Իսկ ընկերությունը առաջարկել էր վերջին երկու տարվա ընթացքում որպես փոխհատուցում տրամադրել 5,7 հազար դոլար, 100 պարկ բրինձ ու հատիկներ, ինչպես նաև մի քանի արկղ սնունդ:
2010 թ. ՄԱԿ-ը գրեթե ամբողջությամբ Shell-ի վրայից հանել էր Նիգեր դելտայում նավթի արտահոսքի պատասխանատվությունը: Այդուհանդերձ, ընթացիկ տարում հայտնի դարձավ, որ ՄԱԿ-ը պատրաստվում է դատական գործընթաց սկսել նավթային ընկերության դեմ:
