«Առաջին լրատվականը» նախօրեին տեղեկացրել էր, որ «Զոլոտոյ գրամոֆոն» հաղորդման ռեժիսոր Մարինա Յաբլոկովան մեղադրել էր ռուս երգիչ Ֆիլիպ Կիրկորովին իրեն հարվածելու համար, ինչի արդյունքում Մարինան ստացել էր ուղեղի ցնցում:
Երեկ ուշ երեկոյան Կիրկորովը հրապարակայնորեն ներողություն է խնդրել Մարինա Յաբլոկովայից և արել հետաքրքիր հայտարարություն:
Նա ասել է, որ հիվանդ է. «Ցավոք, ես ստիպված եմ բարձրաձայնել մի բան, որը նախկինում վախում էի խոստովանել անգամ ինքս ինձ: Հավանաբար ես լուրջ հիվանդ եմ: Տարին երկու անգամ ինձ մոտ լինում են լուրջ նոպաներ, որոնց ընթացքում չեմ հասկանում և չեմ հիշում, թե ինչ եմ անում: Ես ինքս դրանից սարսափում եմ: Միայն հիմա եմ հասկանում, որ ինձ պետք է լուրջ բուժում»,- ասել է նա: «Ես ցանկանում եմ ներողություն խնդրել Մարինա Յաբլոկովայից անձամբ և հրապարակայնորեն: Շատ եմ ցավում կատարվածի համար: Հասկանում եմ, որ այս իրավիճակում դա այնքան էլ ծանրակշիռ չի հնչում, բայց սա ազդակ է լուրջ բուժման համար: Հավատացնում եմ, իրականում ես այդպիսին չեմ: Ներողություն եմ խնդրում նաև նրանցից, ում վրդովել եմ իմ այս քայլով»,- իր անձնական բլոգում գրել է Ֆիլիպ Կիրկորովը:
Հայտնի է, որ Յաբլոկովան հրաժարվել է ետ վերցնել իր հայտարարությունը և պահանջում է պատժել Կիրկորովին:
