Իրանական Shargh օրաթերթի հաղորդմամբ՝ Իրանի նախկին նախագահ, համակարգի նպատակահարմարությունը բնորոշող խորհրդի նախագահ Այաթոլլահ Հաշեմի Ռաֆսանջանին իրանական «Մարդոմսալարի» (Ժողովրդավարություն) կուսակցության ղեկավար անհատների հետ հանդիպման ընթացքում հայտարարել է, որ երկրի այսօրվա ծանր իրավիճակում միակ հույսը ազգային միասնականությունն է:
Ռաֆսանջանին հավելել է. «Ժողովուրդը ցանկանում է, որ իր քվեն ազդեցիկ լինի և ոչ ցուցադրական: Հետևաբար հնարավոր է անցկացնել թափանցիկ ու ազատ ընտրություններ՝ արդար դիտորդներով, ժողովուրդի կամքն իրականացնել իր իսկ միջոցով: Եթե այդ ընթացքում նաև կուսակցություններն ու մամուլը ազատ լինեն, ժողովուրդն էլ կընդունի ընտրության ցանկացած արդյունք, և այդ միջոցով երկրի զարգացումը արագընթաց շարժ կարձանագրի»։
Հիշեցնենք, որ օրեր առաջ Իրանի առաջնորդ Այաթոլլահ Խամենեին հայտարարել էր, թե հարկ եղած դեպքում, հնարավոր է, երկրի վարչակարգը խորհրդարանական դառնա, և գործադիր իշխանության ղեկավարը ընտրվի խորհրդարանի կողմից։ Մի շարք փորձագետներ իրանի առաջնորդի այդ հայտարարությունը քննադատելով՝ հայտարարել էին, թե այդ դեպքում Իրանի ժողովուրդն այլևս զրկվելու է նախագահ ընտրելու իրավունքից, և առաջնորդի լիազորություններն ու կարողություններն ավելի են մեծանալու:
