Այսօր Ռուսաստանի Դաշնության արտաքին գործերի նախարարության անանուն աղբյուրը տարակուսանք է հայտնել Wikileaks-ի հրապարակած այն տեղեկատվության կապակցությամբ, համաձայն որի՝ ՆԱՏՕ-ն այս տարի նախապատրաստել է Ռուսաստանի հնարավոր ագրեսիայից բալթյան երկրների և Լեհաստանի անվտանգության ապահովման ծրագիր: Այս մասին հաղորդում է Interfax-ը:
«Այդօրինակ հայտարարությունները մեզանում բազմաթիվ հարցեր և տարակուսանք են առաջացնում: Մանավանդ որ, ՌԴ-ՆԱՏՕ վերջին համատեղ հայտարարության մեջ հստակ նշված է, որ ՆԱՏՕ-ի և Ռուսաստանի անվտանգությունը շաղկապված են, և Ռուսաստան-ՆԱՏՕ խորհրդի անդամ երկրները հրաժարվելու են մեկը մյուսի դեմ ուժի կիրառումից»:
Ըստ այդ նույն աղբյուրի՝ «ռուսական կողմը բազմիցս բարձրացրել է մեկը մյուսի դեմ չուղղված ռազմական պլանավորման ապահովման անհրաժեշտության մասին հարցը»:
ՆԱՏՕ-ում հայտնել էին, որ դաշինքը միշտ էլ պլանավորել է անդամ երկրների անվտանգության ապահովումը, սակայն Ռուսաստանին չի դիտել որպես իր անվտանգությանը սպառնացող վտանգ:
«ՆԱՏՕ-ի քաղաքականությունը հետևյալն է. այն քննարկում է կոնֆիդենցիալ փաստաթղթերի բովանդակությունը, որոնք կապված են պաշտպանական ծրագրերի հետ: Սակայն ՆԱՏՕ-ն միշտ էլ ունեցել է և պետք է ունենա իր բոլոր դաշնակիցներին պաշտպանելու համապատասխան ծրագրեր: Դա մեր կոլեկտիվ պաշտպանության խնդիրների առանցքն է»,- Interfax-ին հայտնել է ՆԱՏՕ-ի պաշտոնական ներկայացուցիչը` մեկնաբանելով Wikileaks-ի նույն լուրը:
Միաժամանակ նա հղում է արել վերջերս կայացած Ռուսաստան-ՆԱՏՕ գագաթնաժողովում հնչած հայտարարություններին, որ Ռուսաստանն այլևս վտանգ չի հանդիսանում ՆԱՏՕ անդամ երկրների համար: