ՄԱԿ-ի` աշխարհում ընդհանուր համարվող տվյալների համաձայն` ամեն երկրում LGBT համայնքը կազմում է բնակչության թվի 4-7 տոկոսը: Իսկ ի՞նչ կարելի է ասել Հայաստանի մասին: Մեր երկրում LGBT համայնքի (լեսբուհիներ, գեյեր, բիսեքսուալներ, տրանսգենդերներ) թվաքանակի վերաբերյալ հստակ տվյալներ չկան: Պաշտոնական վիճակագրական տվյալներ կան ընդամենը տղամարդկանց հետ հարաբերություն ունեցող կամ գոնե մեկ անգամ ունեցած տղամարդկանց թվի վերաբերյալ, որոնք, սակայն, մի շարք մասնագետների համոզմամբ` հստակ պատկերը չեն ներկայացնում:
Միակ հստակ ուսումնասիրությունը, որ ներկայացնում է հոմոսեքսուալ մարմնավաճառների խմբի հաշվարկային թվերը` «ՀՀ-ում մարմնավաճառների և տղամարդկանց հետ սեռական հարաբերություն ունեցող տղամարդկանց(ՏՍՏ) խմբերի չափերի գնահատման հաշվետվությունն» է, որը, սակայն, պատրաստվել է 2008 թվականին: Նշված հետազոտությունը բավականին հետաքրքիր թվեր է ներկայացնում հայ մարմնավաճառ տղամարդկանց վերաբերյալ. համաձայն հետազոտության` Երևանում կա միջինում 8000, Վանաձորում՝ 200, Գյումրիում 150 ՏՍՏ ներկայացուցիչ: Իսկ եթե ընդհանրացնենք` ՀՀ-ում ՏՍՏ-ների հաշվարկային թիվը կազմել է 12,000-15,000 (միջինում՝ 13,500): Սրանք դեռ 2008-ի տվյալներն են, որոնք սեքսոպաթոլոգ Գևորգ Ազատյանի խոսքով` ամենևին չեն արտացոլում այսօրվա պատկերը: Ազատյանը նշում է, որ նույնասեռական վարքագիծ ունեցող տղամարդիկ ցանկացած երկրի՝ 4,3, իսկ կանայք 2,7%-ն են կազմում, ընդ որում՝ խոսքը սեռահասուն՝ 15-49 տարիքային խմբի մասին է. «Ես վստահ կարող եմ ասել, որ ոչ միայն տղամարդկանց, այլև կանանց պարագայում կտրուկ աճ է արձանագրվում յուրաքանչյուր տարի»: Ազատյանի ներկայացրած ոչ պաշտոնական տվյալների համաձայն` Հայաստանում արդեն իսկ հաշվվում է նույնասեռական վարքագիծ ունեցող մոտ 65,000 տղամարդ և շուրջ 30,000 կին:
