Վրաստանի արտաքին գործերի նախարարությունը Հարավային Օսիայում ռուսական ռեակտիվ համազարկային հրետանու դիվիզիոնի տեղադրումն անվանել է հակավրացական ռուսական քաղաքականության շարունակություն: Վրաց փորձագետները համոզված են. այս քայլը խոսում է այն մասին, որ Ռուսաստանը պատրաստվում է հարձակվողական գործողությունների:
Վրաստանի իշխանությունները պատրաստվում են առաջիկա օրերին խորհրդակցություններ անցկացնել Վրաստանում հավատարմագրված օտարերկրյա դիվանագետների հետ:
«Առաջին լրատվականը» հայտնել է, որ, Interfax գործակալության տեղեկություններով, Հարավային Օսիայում (Ցխինվալի շրջանում)՝ վրացական սահմանի հարևանությամբ, Հարավային օկրուգի զինվորականները տեղադրել են ռեակտիվ համազարկային հրետանու դիվիզիոն: Այս մասին գործակալությանն է հայտնել օկրուգում Interfax-ի աղբյուրը:
Վրաստանի արտգործնախարարությունում նրան ասել են, թե «սա Ռուսաստանի ագրեսիվ քաղաքականության շարունակությունն է վրացական պետականության նկատմամբ և վտանգ է ստեղծում ոչ միայն կովկասյան, այլև սևծովյան տարածաշրջանի խաղաղության և կայունության համար»:
