2010 թ. ՀՀ տարածքում գրանցվել է 42 երկրաշարժ: Այս ցուցանիշը գրեթե չի տարբերվում նախորդ երեք տարիների երկրաշարժների թվից: Այսօր ասուլիսի ժամանակ ուսումնասիրությունների արդյունքները ներկայացրեց Սեյսմիկ պաշտպանության ազգային կենտրոնի պետ Ալվարո Անտոնյանը. «Վտանգավոր էին հատկապես հունվարին Գառնիում և վերջերս Ջերմուկում տեղի ունեցած երկրաշարժները»: Խոսելով Ջերմուկում նոյեմբերի 30-ին տեղի ունեցած երկրաշարժից` Անտոնյանը ասաց, որ այն կանխատեսել էին սեյսմիկ գոտու գնահատման նոր համակարգի միջոցով: Վայքում տեղադրված նոր համակարգը, որը գրանցում է նաև 1,5 բալից թույլ երկրաշարժները, բազմամետրանոց (ավելի քանի 10 պարամետրեր ուսումնասիրող) մեխանիզմ է, ինչի շնորհիվ թույլ է տալիս կանխատեսումներ կատարել: «Թեև կանխատեսման խնդիրն ամբողջ աշխարհում դեռ լուծված չէ, ՀՀ-ն այդ հարցում առաջատարներից մեկն է»,- ասաց Ա. Անտոնյանը: Հավանական երկրաշարժների վնասները նվազագույնի հասցնելու համար անհրաժեշտ է իմանալ` ինչ գործողությունների պետք է դիմել երկրաշարժի դեպքում: «Յուրաքանչյուր մարզում ունենք 3-5 մասնագետ, ինչը բավարար չէ մի ամբողջ մարզի բնակչությանը ուսուցանելու համար: Նախատեսում ենք ավելի շատ մասնագետներ ունենալ, ուսուցման նոր մեթոդներ կիրառել դպրոցներում և կրթական այլ հիմնարկներում, դիմել նոր տեխնոլոգիաների օգնությանը իրազեկությունը բարձրացնելու համար, քանզի պաշտպանված ես, եթե իրազեկ ես»,- ասաց Ա.Անտոնյանը: