2010 թ. դեկտեմբերի 7-ի նիստում ԿԲ խորհուրդը որոշեց անփոփոխ թողնել վերաֆինանսավորման տոկոսադրույքը` 7.25%: «2010 թ. նոյեմբերին նախորդ ամսվա նկատմամբ արձանագրվել է 1.6% գնաճ, որի պարագայում 12-ամսյա ցուցանիշն ավելացել է 0.5 տոկոսային կետով` կազմելով 9.6%: Խորհուրդը փաստեց, որ 12-ամսյա գնաճի բարձր մակարդակը պայմանավորվում է գյուղատնտեսական և միջազգային շուկաներում պարենային ապրանքների գների աճով. պարենային ապրանքների 12-ամսյա գնաճը կազմել է 7.5%, ընդ որում՝ մրգի և բանջարեղենի, մսամթերքի, կաթնամթերքի, հացամթերքի գների աճի ընդհանուր նպաստումը 12-ամսյա գնաճին, նոյեմբերի վերջի դրությամբ, կազմել է շուրջ 6.7 տոկոսային կետ»,- նշված է ԿԲ հասարակայնության հետ կապերի ծառայության տարածած հաղորդագրության մեջ: Միաժամանակ, այդ հաղորդագրությունում նշված է, որ էապես փոքրանում է հավանականությունը, որ գնաճը կանխատեսվող ժամանակային հորիզոնում կգտնվի նպատակային միջակայքի սահմաններում: «Հաշվի առնելով համախառն պահանջարկի վրա դրամավարկային քաղաքականության ազդեցության լագերը, առաջարկի գործոնների և դրանց երկրորդային ազդեցությունների ուժգնացման պարագայում, ԿԲ խորհուրդն ավելի հավանական է համարում դրամավարկային պայմանների խստացումը»,- նշված է այդ հաղորդագրությունում:
