Ձևավորվել է Ժամանակավորապես անաշխատունակ ճանաչված անձանց իրավունքների պաշտպանության հասարակական նախաձեռնություն, որը տարածել է պահանջագիր` ուղղված հայաստանի վարչապետին: Պահանջագրի տեքստը ներկայացնում ենք ամբողջությամբ:
ՊԱՀԱՆՋ
«Ժամանակավոր անաշխատունակության նպաստների մասին» ՀՀ օրենքի 22-րդ հոդվածով սահմանված հաշվարկման կարգը վերանայելու և այն նախկինում գործող` «Ժամանակավոր անաշխատունակության դեպքերից պարտադիր սոցիալական ապահովագրության մասին» ՀՀ օրենքի 22-րդ հոդվածով սահմանված կարգով հաշվարկելու մասին
Հաշվի առնելով, որ 27.10.2010 թ. ՀՀ Ազգային ժողովը երրորդ ընթերցմամբ ընդունել է «Ժամանակավոր անաշխատունակության նպաստների մասին» ՀՀ օրենքը, որտեղ տեղ գտած մի շարք դրույթներ առաջացրել են Հայաստանի Հանրապետության բազմաթիվ քաղաքացիների մտահոգությունը,
նկատի ունենալով վերոնշյալ օրենքի կարևորությունը ՀՀ քաղաքացիների սոցիալական իրավունքների պաշտպանության և Հայաստանի Հանրապետության՝ միջազգային պայմանագրերով ստանձնած պարտավորությունների իրականացման տեսանկյունից,
մտահոգ լինելով Հայաստանում առկա անբարենպաստ ժողովրդագրական իրավիճակի խորացման հիմնախնդրով` պահանջում ենք վերանայել «Ժամանակավոր անաշխատունակության նպաստների մասին» ՀՀ օրենքի 22-րդ հոդվածով սահմանված հաշվարկման կարգը և այն համապատասխանեցնել նախկինում գործող` «Ժամանակավոր անաշխատունակության դեպքերից պարտադիր սոցիալական ապահովագրության մասին» ՀՀ օրենքի 22-րդ հոդվածով սահմանված կարգին:
Վիճարկվող` «Ժամանակավոր անաշխատունակության նպաստների մասին» ՀՀ օրենքի 22-րդ հոդվածի 2-րդ կետի համաձայն` «Եթե սույն օրենքով սահմանված կարգով հաշվարկված միջին ամuական աշխատավարձի (եկամտի) չափը գերազանցում է «Նվազագույն ամuական աշխատավարձի մաuին» Հայաuտանի Հանրապետության oրենքի 1-ին հոդվածով uահմանված չափի հնգապատիկը, ապա նպաստը հաշվարկվում է «Նվազագույն ամuական աշխատավարձի մաuին» Հայաuտանի Հանրապետության oրենքի 1-ին հոդվածով uահմանված նվազագույն ամuական աշխատավարձի հնգապատիկից` սույն հոդվածով սահմանված կարգով»։
Այս դրույթը ոտնահարում է ՀՀ միջազգային պայմանագրերով նախատեսված` մարդու և քաղաքացու մի շարք սոցիալական իրավունքներ, և հակասում է Հայաստանի Հանրապետության կողմից որդեգրված մի շարք քաղաքականություններով սահմանված սկզբունքներին:
Մեր խորին համոզմամբ վիճարկվող օրենքի 22-րդ հոդվածով սահմանված դրույթը`
• վտանգում է Հայաստանի ժողովրդագրական աճը` վտանգելով ազգային անվտանգության հիմքերը Հայաստանի Հանրապետությունում,
• հավակնելով պայքարել որոշ հղի կանանց կողմից կատարված խարդախությունների դեմ, պայքար է սկում ոչ միայն խարդախ քաղաքացիների, այլև ԲՈԼՈՐ հղիների դեմ,
• խրախուսում է որակյալ կադրերի արտագաղթը Հայաստանի Հանրապետությունից,
• հակասում է աղքատության հաղթահարման և սոցիալական ապահովության իրավունքի ոլորտում պետության ստանձնած պարտավորությունների տրամաբանությանը,
• ոտնահարում է կանանց և տղամարդկանց իրավահավասարության սկզբունքը,
• վտանգում է հայ մայրերի և նրանց մանուկների առողջությունը և ոտնահարում է երեխաների իրավունքները,
• հակասում է երիտասարդ ընտանիքների աջակցության ՀՀ կառավարության վարած քաղաքականությանը,
• խթանում է ստվերային տնտեսության ընդլայնումը:
Հաշվի առնելով վերոնշյալները՝ պահանջում ենք «Ժամանակավոր անաշխատունակության նպաստների մասին» ՀՀ օրենքի 22-րդ հոդվածի 2-րդ կետով ամրագրված դրույթը անհապաղ փոփոխության ենթարկել և այն համապատասխանեցնել նախկինում գործող «Ժամանակավոր անաշխատունակության դեպքերից պարտադիր սոցիալական ապահովագրության մասին» ՀՀ օրենքի 22-րդ հոդվածի 2-րդ կետով սահմանված պայմաններին:
Օրեքի մեջ փոփոխություններ կատարելու պահանջով այսօր նամակ է ուղղվել Հայաստանի Հանրապետության վարչապետին` հավաքագրված ստորագրություններով: Ի լրումն դրան՝ սույն թվականի դեկտեմբերի 9-ին՝ ժ. 12.00-ին, տեղի կունենա օրենքի մեջ կատարված փոփոխություններին դեմ քաղաքացիների բողոքի ակցիա ՀՀ կառավարության շենքի դիմաց:
Ժամանակավորապես անաշխատունակ ճանաչված անձանց իրավունքների պաշտպանության հասարակական նախաձեռնության անդամներ: