Հայ ազգային կոնգրեսի ներկայացուցիչ Գուրգեն Եղիազարյանը օրինաչափ է համարում Վիգեն Սարգսյանի` նախագահի աշխատակազմի ղեկավարի պաշտոնում նշանակումը` դա բացատրելով ԱՄՆ-ի և Եվրոպայի` Սերժ Սարգսյանին սատարելու հանգամանքով: Այս մասին նա ասաց «Առաջին լրատվական»-ի հետ զրույցում:
Խոսելով նախագահի աշխատակազմի նորանշանակ ղեկավարի արևմտամետ դիրքորոշման մասին` Գուրգեն Եղիազարյանը նկատեց, որ հայաստանյան իշխանությունները Ռուսաստանի հետ ռուսամետ են, ԱՄՆ-ի հետ` ամերիկամետ: «Այս խաղը կշարունակվի այնքան ժամանակ, քանի դեռ չի բացահայտվել իշխանությունների իրական կողմնորոշումը, սակայն հայտնի է, որ երկու նապաստակների հետևից ընկնողը ոչ մեկին էլ չի կարողանում որսալ»,- նկատեց ՀԱԿ ներկայացուցիչը:
Նրա խոսքով՝ իշխանությունները պետք է միայն և միայն հայամետ լինեն, հակառակ դեպքում ցանկացած այլ «մետություն» կբերի թյուրիմացությունների:
Հիշեցնենք, որ ավելի քան մեկ տարի առաջ մամուլում լուրեր էին տարածվել, որ Վիգեն Սարգսյանը ամերիկյան գործակալ է: Նմանօրինակ բովանդակությամբ անանուն նամակներ ուղարկվել էին հայաստանյան գրեթե բոլոր լրատվամիջոցներին:
ՀՀ ԱԱԾ-ն այդ առնչությամբ հերքում էր տարածել: «ՀՀ ԱԱԾ-ն հայտարարում է, որ տարածված նամակը քաղաքական և լրատվական որոշակի շրջանակների հերթական չհաջողված արկածախնդրության դրսևորումներից է, ինչը բացարձակապես չի համապատասխանում իրականությանը և չի կարող անգամ ճշմարտանման լինել»,- նշված էր հաղորդագրությունում:
Հիշեցնենք նաև, որ նախագահի աշխատակազմի ղեկավարի պաշտոնը թափուր էր մնացել Կարեն Կարապետյանի` այդ պաշտոնից հեռանալուց հետո:
