Հայաստանի LGBT (լեսբուհիներ, գեյեր, բիսեքսուալներ, տրանսգենդերներ) համայնքի ներկայացուցիչների բավականին շահավետ բիզնեսի մասին շատերս ենք տեղյակ, սակայն անօրինական բիզնեսի թիկունքում թաքնված տհաճ նրբություններին մոտիկից ծանոթ են միայն Երևանի քաղաքապետարանին հարող տարածքի բնակիչները երևի, և սա, ցավոք, ոչ իրենց կամոք:
Յուրաքանչյուր իջնող երեկո մի նոր արտասովոր իրավիճակ է բերում հատկապես քաղաքապետարանին հարող Մանկական զբոսայգու տարածք և, բնականաբար, նորանոր «հերոսուհիներ»: Պետք է միայն տեսնել, թե ինչ է կատարվում քաղաքապետարանի դիմացի մայթին երեկոյան 10-11-ից հետո, երբ իրենց աստղային ժամն են սկսում վայելել առևտրային սեքսով զբաղվող տրանսվեստիտները: Նրանք կանացի հագուստներով տղամարդ մարմնավաճառներն են, որոնց շարքերն օրեցօր թարմանում են, իսկ շահավետ բիզնեսին խանգարողներ գրեթե չկան:
1in.am-ի լրագրողին հաջողվեց երկարատև բանակցություններից հետո խոսել նրանցից մեկի հետ: Շիկահեր «գեղեցկուհի» Լիզան անչափ ամաչկոտ հայացքով մի փոքրիկ գաղտնիք բացեց և արդարացրեց իրենց՝ այդտեղ գտնվելու հանգամանքը. «Ո՞վ պետք է մեզ արգելի, նրանք, ովքեր գուցե պետք է արգելեին, իրենք էլ օգտվում են մեր ծառայություններից»,- նշեց նա:
Ի դեպ, Լիզան հպարտորեն ընդգծեց, որ, չնայած մարմնավաճառությունը Հայաստանում արգելված է, ոստիկանությունը հազվադեպ է նույնասեռական մարմնավաճառներին խանգարում: Ավելին` նրանք այգում պահպանում են հասարակական անդորր, և վտանգի դեպքում նույնասեռականները կարող են դիմել ոստիկանների օգնությանը:
Մայրաքաղաքի տերերի աչքի առջև գործող մարմնավաճառների այս շուկան իսկական աղետի է վերածել Զաքյան փողոցի բնակիչների կյանքը: «Անպարկեշտ գոռգոռոցներ, սեռական ծառայությունների համար տարվող բարձրաձայն սակարկություններ, այլանդակ իրավիճակ է տիրում այստեղ»,- մեզ հետ զրույցում նշեց տարածքում բնակվող Ամալյա Խաչատրյանը:
Տարիներ շարունակ շրջակայքի բնակիչների բողոքները, թե երեխաներին չեն համարձակվում միայնակ թողնել բակ, թե օրը ցերեկով ևս կարող են նմանները մոտենալ նորմալ քաղաքացիներին և անվայել առաջարկություններ անել, ոչ մի արձագանք չեն ստանում:
Այսպիով, Երևանի քաղաքապետարանից ոչ շատ հեռու գտնվող Մանկական այգին այժմ հայտնի է որպես միասեռականների հավաքատեղի, որտեղ դասական միասեռականներին ավելի ուշ ժամերի փոխարինում են կանացի շորերով մարմնավաճառ միասեռականները, ովքեր իրենց իսկ խոսքերով` հաճախորդների պակաս չեն զգում: