«Զոլոտոյ գրամոֆոն – 2010» մրցանակաբաշխության երկրորդ ռեժիսոր Մարինա Յաբլոկովան Մոսկվայի ոստիկանության վարչության պետի անունով հայտարարություն է ներկայացրել, ուր հայտնում է, որ հայտնի երգիչ Ֆիլիպ Կիրկորովը ծեծի է ենթարկել իրեն:
Կնոջ փաստաբանի խոսքերով, Յաբլոկովան խնդրել է Կիրկորովի դեմ քրեական գործ հարուցել: Նա պնդում է, որ երգիչը անպատվել է իրեն և ծեծել:
Ինչպես պատմել է փաստաբանը, իր հաճախորդի և Կիրկորովի միջև բախումը տեղի է ունեցել Կրեմլի պալատում, երբ երգիչը միջոցառմանը ելույթ ունենալուց առաջ փորձի է եղել: Կիրկորովին դուր չի եկել, որ լույսն անմիջապես իր աչքերին է ընկնում, և շատ կոպիտ այդ մասին հայտնել է Յաբլոկովային, որը պատասխանատու է եղել տեխնիկական ապահովման համար:
«Յաբլոկովան հանգիստ խնդրել է Կիրկորովին սպասել, մինչև լույսը կուղղեն, ինչին Կիրկորովը հայհոյանքներով է պատասխանել: Այդ ժամանակ Մարինան խնդրել է Ֆիլիպին չվիրավորել իրեն: Ֆիլիպը կատաղել է և բղավելով՝ «ես քեզ կսպանեմ», վազել է նրա կողմն ու ձեռքով հարվածել կնոջ դեմքին»,- պատմել է փաստաբանը: Հարվածից Մարինան ընկել է, որից հետո Կիրկորովը շարունակել է ոտքերով հարվածներ հասցնել: Փաստաբանը նաև ավելացրել է, որ իր հաճախորդը կորցրել է գիտակցությունը, ավելի ուշ բժիշկները նրա մոտ հայտնաբերել են ուղեղի ցնցում և բազմաթիվ կապտուկներ:
Հիշեցնենք՝ սա առաջին դեպքը չէ, որ Կիրկորովը հարձակվում է կանանց վրա: 2004 թ. նա հայհոյել էր հայազգի լրագրողուհի Իրինա Արզոյանին, որից հետո դատարանը նրան տուգանել էր 60 հազար ռուբլով:
