Բաքվի Новое Время թերթը գրում է, որ մեկը մյուսի հետևից Բաքու են ժամանում թուրքական բարձրաստիճան պաշտոնյաների պատվիրակությունները։ Նախ Ադրբեջան այցելեց Թուրքիայի պաշտպանության նախարար Իսմեթ Յըլմազը, ապա կրոնական գործերի նախարար Մեհմեթ Գյորմեզը։
Վերջինս ուրբաթօրյա նամազի ժամանակ ցանկություն հայտնեց հաջորդ ուրբաթօրյա նամազն անցկացնել «Շուշիի մզկիթում»՝ ընդգծելով, որ Թուրքիայի մուսուլմաններն Ադրբեջանի մուսուլմանների նման աղոթում են Բարձրյալին՝ Ադրբեջանի «օկուպացված» տարածքների վերադարձման համար։ Իսմեթ Յըլմազն իր հերթին հայտարարեց, որ Թուրքիան պատրաստ է ամեն տիպի օգնություն ցուցաբերել Ադրբեջանին։
Այս ամենը վկայում է, որ ԱՄՆ-ն իր կովկասյան քաղաքականությունը հիմնականում իրականացնում է Թուրքիայի միջոցով։ Բացառված չէ, որ Անկարան երկար ժամանակ խաղա այդ դերը տարածաշրջանում։ Ակնհայտ է մեկ բան. ԱՄՆ-ը, օգտվելով Թուրքիայի միջնորդությունից, նախկինի նման այստեղ իրականացնելու է իր քաղաքականությունը։
Թուրքիան էլ իր հերթին հակված է Կովկասում տիրող իրավիճակին չմիջամտելու քաղաքականությանը։ Սակայն միևնույն ժամանակ տվյալ տարածաշրջանում նրա ակտիվության մասին վկայությունները քիչ չեն, ինչպիսին, օրինակ, ոչ վաղ անցյալում Թուրքիայի արտգործնախարար Ահմեդ Դավութօղլուի և Ադրբեջանի փոխարտգործնախարար Արազ Ազիմովի հանդիպումն է, որում, երկկողմանի հարաբերություններից բացի, քննարկվել են նաև Ղարաբաղյան հակամարտության կարգավորման հեռանկարները և Հարավային Կովկասում տիրող իրավիճակն ընդհանրապես։
