Առաջիկա հինգշաբթի օրը ՀՀԿ-ի գործադիր նիստում կքննարկվի կոալիցիայից ԲՀԿ-ի դուրս գալու հարցը: Այս մասին այսօր հրավիրված ասուլիսի ընթացքում տեղեկացրեց ՀՀԿ ԱԺ պատգամավոր Հովհաննես Սահակյանը և նկատեց, որ ԲՀԿ-ին նոր հուշագիր չեն առաջարկել: Նա միաժամանակ նկատեց, որ «թեժ աշուն» ասվածի կանխատեսումները որոշ չափով արդարացվեցին:
ԱԺ պատգամավորը նաև ասաց, որ իրենք իրենց քայլերը կարողացան այնպես կատարել, որ թե ՀԱԿ-ը, թե ժողվուրդը հասկացան, որ պետք է պատրաստվել, ոչ թե արտահերթ, այլ հերթական ընտրություններին:
Բանավեճին հրավիրված ԱԺ պատգամավոր Վարդան Խաչատրյանը ևս նկատեց, որ «թեժ աշուն»-ը չարդարացվեց:
Հարցին, թե ընտրություններում ինչը կլինի ուժերի հիմնական «ֆիշկան», Հովհաննես Սահակյանը պատասխանեց. «ՀՀԿ-ն իր քարոզարշավը սկսում է հենց ընտրությունների հաջորդ օրը, իսկ քարոզարշավում, թե որն է լինելու մեր «ֆիշկան» չեմ կարծում, որ տեղին է հիմա բացահայտել»:
Իսկ Վարդան Խաչատրյանը, որպես քարոզարշավի հիմնական «ֆիշկա», առանձնացրեց ներքաղաքական խնդիրները, տնտեսական հարցերը, բյուջեն` նկատելով, որ ամեն ինչ նույնն է, և դժվար թե նոր «հեծանիվ հայտնաբերվի»:
Ինչ վերաբերում է ԼՂ հիմնախնդրին, Վարդան Խաչատրյանը նկատեց, որ Ադրբեջանը «քցել է» Ռուսաստանին, ինչի արդյունքում հնարավոր է, որ Ռուսաստանը մի կողմ քաշվի` տեղը զիջելով Ֆրանսիային:
Հովհաննես Սահակյանը նաև կարծիք հայտնեց, որ գլոբալ առումով փոփոխություններ չեն լինի: Խոսելով Ադրբեջանի կողմից կառուցվող պատի մասին` նա ասաց, որ այդ պարագայում հետաքրքիր է, թե ինչո՞ւ են ռազմատենչ հայտարարություններ անում, կամ էլ, ամենայն հավանականությամբ, ուրիշ պատ չունեն , որ գլուխները պատին տան, դրա համար պատ են կառուցում:
Անցում կատարելով բանակում ստեղծված իրավիճակին` Հովհաննես Սահակյանը նշեց, որ ցանկացած բացասական երևույթ իր համար անընդունելի է, Իսկ Վարդան Խաչատրյանն ասաց, որ բանակը «սուրբ գործ» է, և անթույլատրելի են նման երևույթները:
