Ծանրամարտի աշխարհի չեմպիոնուհի Նազիկ Ավդալյանն այսօր լրագրողների հետ հանդիպմանը, խոսելով մեծ սպորտ վերադառնալու հավանականության և ապագա ծրագրերի մասին, ասաց, որ գտնվում է վերականգնողական փուլում: «Կարծում եմ, որ երկու տարուց կվերադառնամ: Բժիշկները միայն վեց ամսից կկարողանան ասել`կկարողանա՞մ պարապել, թե` ոչ:
Ինչ վերաբերում է սպորտը թողնելուն, ապա մարզուհին ասաց, որ չի մտածել այդ մասին, քանի որ բժիշկները միշտ հույս են տվել, ասելով, որ կկարողանա վերադառնալ սպորտ:
«Ցավալի է, որ չկարողացա մասնակցել աշխարհի այս առաջնությանը, վերականգնվելուց հետո հույս ունեմ` կմասնակցեմ հաջորդ աշխարհի ու Եվրոպայի առաջնություններին»,- ցանկություն հայտնեց Ն. Ավդալյանը:
Ավդալյանը տեղեկացրեց, որ իր նախաձեռնությամբ մարզադպրոց է բացվելու Վանաձորում, որը հիմա վերանորոգման փուլում է գտնվում: Նա ցանկություն հայտնեց, որ հատուկ մարզադպրոց ստեղծվի նաև աղջիկների համար: Նրա խոսքով` հիմա շատ լավ աղջիկներ կան, որ ուզում են զբաղվել այս մարզաձևով, սակայն հիմնականում մայրերն են դեմ լինում իրենց աղջիկների` այդ սպորտաձևով զբաղվելուն: «Եթե իմ աղջիկն էլ որոշի զբաղվել ծանրամարտով, ես դեմ չեմ լինի»,- ընդգծեց մարզուհին` հավելելով, որ այս բնագավառում շատ են հիասթափությունները, խորհուրդ տվեց աղջիկներին չհուսահատվել դժվարություններից:
Ինչ վերաբերում է այս տարվա ապրիլին տեղի ունեցած ավտովթարին, ասաց, որ մարդիկ չեն հավատում, որ վթարը պատահական է եղել: «Եթե ինչ որ բան լինում է, ուրեմն պետք է լինի: Փառք Աստծո, հաղթահարում եմ ու էլի կհաղթահարեմ»,- ասաց նա:
Անդրադառնալով մեր մյուս աղջիկ ծանրամարտիկներին`Մելինեին ու Հռիփսիմե Խուրշուդյանին, Նազիկ Ավդալյանը նրանց մաղթեց հաջողություն ու ցանկացավ, որ մասնակցեն այնպես, որ գոհ լինեն իրենց ցուցադրած արդյունքներից:
