Հյուսիսարևելյան տարածաշրջանում պաշտպանական ջոկատների ձևավորման կազմակերպիչ Ավիկ Օհանյանը մամուլի ասուլիսի ժամանակ տեղեկացրեց, որ նոյեմբերի 1-ին, «Հարավկովկասյան երկաթուղի» ՓԲԸ տնօրեն Շևքեթ Շայդուլինի որոշմամբ, վերացվել է Սանահինի դեպոն, և նրա որոշակի գործառույթներ տրվել են Գյումրիի դեպոյին: «Հարավկովկասյան երկաթուղի» ՓԲԸ ղեկավարությունը իր այդ քայլը պատճառաբանել է տնտեսական նպատակահարմարությամբ, մինչդեռ դեպոյի վերացումը զրկում է Հայաստանին Վրաստանի տարածքից Հայաստան մտնող բեռնափոխադրումների խափանումները շտկելու և կանխարգելելու օպերատիվ միջամտությունից: Սանահին լոկոմոտիվային դեպոն սահմանամերձ դեպո է: Այն Հայաստանի համար ունի ռազմավարական նշանակություն: 1990-ական թվականներին Ադրբեջանի հետ չհայտարարված պատերազմի ժամանակ Վրաստանի երկաթուղայինները հրաժարվում էին Հայաստանի բեռները տեղափոխել Մառնեուլի, Շուլավերի և Սարդախլուի ուղեմասերով՝ պատճառաբանելով այս տարածքներում բնակվող ադրբեջանցիների անվերահսկելիությամբ, որի հետևանքով երկաթուղում պարբերաբար կատարվում էին ահաբեկչական գործողություններ: Հայաստանի բեռնափոխադրումներն այդ իրավիճակում կատարվում էին բացառապես Սանահինի լոկոմոտիվային բրիգադների և դեպոյի աշխատակիցների ջանքերով: Նշենք, որ Սանահինի դեպոյի վերացման հետևանքով 162 աշխատակից դարձել է գործազուրկ: