ԱՄՆ նախագահ Բարաք Օբաման հոկտեմբերի 16-ին բացել է սևամորթների իրավունքների շարժման առաջնորդ Մարթին Լյութեր Քինգի հուշարձանը:
Ինչպես հաղորդում է Associated Press-ը, ԱՄՆ մայրաքաղաքում հուշարձանի բացման հանդիսավոր արարողությանը ներկա են եղել նախագահի կինը`Միշել Օբաման, ԱՄՆ փոխնախագահ Ջո Բայդենը, երգիչ Սթիվի Ուանդերը, երգչուհիներ Արետա Ֆրանկլինը, Ջենիֆեր Հոլիդեյը և ուրիշներ: Հանդիսավոր բացման արարողության պատվավոր հյուրերը եղել են Մարթին Լյութեր Քինգի երեխաները:
Արարողությանը ներկա են եղել հազարավոր մարդիկ, մեծ թվով սևամորթներ: Շատերը հատուկ ժամանել էին ԱՄՆ մայրաքաղաք` միջոցառմանը ներկա գտնվելու համար:
Քինգի հուշարձանը տեղադրված է ԱՄՆ նախկին նախագահներ Թոմաս Ջեֆերսոնի և Աբրահամ Լինքոլնի հուշարձանների միջև: Այն իրենից ներկայացնում է 9 մետրանոց գրանիտե արձան: Քինգը կանգնած է՝ ձեռքերը կրծքին խաչած, ձախ ձեռքին թուղթ է` նրա «Ես երազում եմ» (I have a dream) հայտնի ճառի տեքստով: Արձանի ստեղծման համար ծախսվել է 15 տարի:
Քինգն իր հայտնի ճառն արտասանել է 1963 թ. օգոստոսի 28-ին: Իր խոսքում նա հույս է հայտնել, որ ապագայում մաշկի տարբեր գույն ունեցոող մարդիկ կարող են ապրել հավասար իրավունքներով: 1964 թ. Մարթին Լյութեր Քինգը դարձել է Խաղաղության Նոբելյան մրցանակի դափնեկիր: Նա սպանվել է 1968 թ.: