Իտալիայի մայրաքաղաք Հռումում կառավարության և համաշխարհային ֆինանսական ընկերությունների քաղաքականության դեմ բողոքի ցույցերը վերաճել են զանգվածային անկարգության: Դրանք աջակցում են նյույորքյան «Օկուպացնել Ուոլ Սթրիթը» շարժմանը: Այս մասին հայտնում է news.liga.net կայքը:
Բողոքի ցույցը սկսվել է Իտալիայի դրոշների այրումով, որոնք ցուցարարները պոկել էին Հռոմի կենտրոնական հյուրանոցներից մեկի վրայից: Ցույցերի մասնակիցների թիվը հասնում է 150 հազարի:
Ցուցարարների մեծամասնությունն ուսանողներ են, երիտասարդ մասնագետներ, որոնք ստիպված են աշխատել առանց աշխատանքային պայմանագրերի և երաշխավորված սոցիալական վճարների, ինչպես նաև՝ տարբեր կազմակերպությունների գործազուրկ աշխատակիցներ, ովքեր ստանում են գործազրկության թոշակ: Նրանք պահանջում են պահպանել աշխատանքի վճարման կանոնները, դպրոցական և համալսարանական արժանապատիվ կրթության երաշխիքները, գիտական հետազոտությունների ֆինանսավորումը:
Իտալական ԶՄԼ-ները հաղորդում են, որ շաբաթ երեկոյան ցուցարարներն այրել են երկրի պաշտպանության նախարարության շենքի երկու հարկերը: Փողոցներում վառում են ավտոմեքենաներ, ջարդում բանկերի և խանութների ցուցանակները:
Ոստիկանությունը փորձում է արցունքաբեր գազով և ջրցան մեքենաներով ցուցարարներին ցրել: Զրահապատ ոստիկանական մեքենաները մխրճվում են ցուցարարների շարքերը:
Ակցիայի կազմակերպիչները քննադատում են նաև ցուցարարների անկարգությունները: Նրանցից ոմանք նաև օգնում են ոստիկանությանը` փորձելով հանդարտեցնել երիտասարդների ագրեսիվ տրամադրությունը:
Ներկայումս ցուցարարներն առավել ակտիվ են Կոլիզեյի տարածքում, որտեղ կառուցում են բարիկադներ:
Նախնական տվյալներով` վիրավորվել են 30 հեծյալ իրավապահներ և 20-ից ավելի ցուցարարներ:
