«Գաֆեսճյան» արվեստի կենտրոնում այսօր տեղի ունեցավ հերթական «Ստեղծագործականություն և երևակայություն» խորագրով կրթական ծրագիրը, որը նախատեսված է 6-12 տարեկան երեխաների համար:
Ծրագիրն իրականացվում է չեխ արվեստագետ Իվանա Շրամկովայի «Երկրաչափական ձևեր և պատկերներ» ցուցահանդեսի շրջանակում:
Կրթական ծրագրի ընթացքում 6-12 տարեկան դպրոցահասակ երեխաները հատուկ խաղ-դասերի ընթացքում գունազարդում են չեխ ապակեգործ Իվանա Շրամկովայի գունավոր, վառ ու յուրօրինակ էսքիզներով արված աշխատանքները: Դպրոցների հետ համագործակցությունը, «Գաֆեսճյան» արվեստի կենտրոնի հասարակայնության հետ կապերի և մարքեթինգի բաժնի տնօրեն Աննա Սիմոնյանի խոսքով, ունենալու է շարունակական բնույթ: Յուրաքանչյուր շաբաթ օր կազմակերպվող խաղ-դասերին հնարավորություն ունեն մասնակցելու նաև ծրագրին նախապես հերթագրված երեխաների ծնողները:
Նրա խոսքով` ծրագրի նպատակն է սերտացնել ընտանիք-թանգարան կապը, նպաստել երեխաների գեղագիտական ճաշակի բարձրացմանը: Ըստ նրա՝ անվճար անցկացվող ծրագիրը նպատակ ունի ներգրավել ընտանիքների, հմուտ խաղավարների ու հաճելի միջավայրում մասնագետների միջոցով օգնել երեխաներին իրականացնել իրենց երազանքները:
Նշենք, որ վերջերս թանգարանում բացվել է հունգարացի քանդակագործ, նկարիչ, փոփ-արտ ուղղության հիմնադիր Վիկտոր Վազարելիի ցուցադրությունը, որի շրջանակում էլ տեղի է ունենում ևս մեկ կրթական ծրագիր, սակայն այս անգամ`նախատեսված 12 տարեկանից բարձր երեխաների համար: Ծրագրին կարող են մասնակցել մինչև 32 տարեկան անձինք:
