ՅՈՒՆԵՍԿՕ-ի հարցերով Հայաստանի ազգային հանձնաժողովի` անցած ամիս մեկնարկած «Ճանաչիր աշխարհի մշակույթներն ու երկրներն» ծրագրի շրջանակներում հոկտեմբերի 14-ին Երևանի Եղիշե Չարենցի անվան դպրոցը հյուրընկալել է Հայաստանում Մեծ Բրիտանիայի և Հյուսիսային Իռլանդիայի Միացյալ Թագավորության դեսպան Չարլզ Լոնսդեյլին:
Միջոցառմանը ներկա էին ՀՀ արտաքին գործերի, կրթության և գիտության նախարարությունների, ինչպես նաև Քաղաքապետարանի ներկայացուցիչներ:
Իր ողջույնի խոսքում ԱԳՆ միջազգային կազմակերպությունների վարչության պետ, ՅՈՒՆԵՍԿՕ-ի հարցերով Հայաստանի ազգային հանձնաժողովի գլխավոր քարտուղար Վահրամ Կաժոյանը, ներկայացնելով ՀՀ-ում ՄԹ դեսպան Չարլզ Լոնսդեյլին և նրա անցած դիվանագիտական ուղին, գոհունակություն է հայտնել երկու երկրների միջև առկա հարաբերությունների մակարդակի առնչությամբ` միաժամանակ նշելով, որ գոյություն ունի քաղաքական, տնտեսական և մշակութային կապերի զարգացման վիթխարի ներուժ:
Միջոցառմանը աշակերտների համար ծավալուն դասախոսությամբ հանդես է եկել ՀՀ-ում Միացյալ Թագավորության դեսպան Չարլզ Լոնսդեյլը` ներկայացնելով Միացյալ Թագավորությունը և նրա ժողովրդին, վերջինիս մշակույթն ու ավանդույթները, կրթական համակարգը, ինչպես նաև անդրադառնալով երկու ժողովուրդների նմանություններին: Դեսպանը նաև պատասխանել է հայ դպրոցականների բազմաթիվ հարցերի: