«Հույսի կամուրջ» կազմակերպությունում այսօր տեղի ունեցավ «Հավասար հնարավորություններ ԶԼՄ 9-րդ մրցույթին ընդառաջ» սեմինարը լրագրողների համար, որը նախաձեռնել են «Հույսի կամուրջ» և «Լրագրողներ հանուն ապագայի» կազմակերպությունները:
«Արևածաղիկ» մրցույթը 9-րդ անգամ է իրականացվում։ Նպատակն է հավասար հնարավորությունների ստեղծումը։ Մրցույթին կարող են նյութեր ներկայացնել մեկ տարվա կտրվածքով` 2010 թ. նոյեմբերի 20-ից մինչև 2011 թ. նոյեմբերի 20-ն ընկած ժամանակահատվածում, իսկ վերջնաժամկետը 21-ն է: «Հույսի կամուրջ» ՀԿ ներկայացուցիչ Զառա Բաթոյանը նշեց, որ հնարավոր է՝ միևնույն լրատվամիջոցից մի քանի լրագրող նյութ ներկայացնի, իսկ մեկ հոգին կարող է ներկայացնել առավելագույնը երեք աշխատանք: Մրցույթի արդյունքները կամփոփվեն դեկտեմբերի 3-ին` Հաշմանդամների միջազգային օրը:
Մրցույթի անաչառությունը ապահովելու համար ժյուրին հրավիրվում է Արա Շիրինյանին, Նունե Սարգսյանին, Արտաշես Խաչատրյանին, Նունե Ալեքսանյանին: Որպես սկզբունք`առաջին մրցանակ շահած լրագրողները հաջորդ տարի մրցութային հանձնաժողովի կազմում են ընդգրկվում: Շատ կարևոր են մրցույթի չափանիշները՝ հաշմանդամություն ունեցող մարդկանց կրթական, աշխատանքային, գենդերային, սոցիալական խնդիրների խորքային և համապարփակ ներկայացումը, խրախուսելի է՝ դժվարությունը հաղթահարած պատմության տեսքով, ինչպես նաև կարևոր է պահպանել հաշմանդամություն ունեցող մարդկանց նկարահանելու և ձայնագրելու էթիկան: Բացի այդ, կարևոր է նպաստել հաշմանդամություն ունեցող մարդկանց համար հավասար հնարավորությունների ստեղծմանը և այլն:
Գլխավոր մրցանակը տրվելու է լավագույն հրապարակման համար` բարձրակարգ համակարգիչ կամ համարժեք գումար, 1-ին, 2-րդ, 3-րդ մրցանակները՝ լավագույն հեռուստահաղորդման, ռադիոհաղորդման և տպագիր նյութի համար, ինչպես նաև կլինեն հատուկ և խրախուսական մրցանակներ:
Այսօր կազմակերպած սեմինարի ընթացքում ԶԼՄ-ներին առաջարկություններ եղան հաշմանդամություն ունեցող մարդկանց խնդիրների լուսաբանման առումով, թե առհասարակ ինչ դժվարություններ կան այդ մարդկանց հետ հաղորդակցվելիս: Կարևոր է նրանց մասին գրելիս ճիշտ բառեր ընտրել նրանց չվիրավորելու համար: