Այսօր Երևանում մեկնարկել է հայ ֆերմերների առաջին համաշխարհային «Հայագրոֆորում» խորագրով համաժողովը, որն անցկացվում է ՀՀ անկախության 20-րդ տարեդարձին նվիրված միջոցառումների շրջանակներում:
ՀՀ վարչապետ Տիգրան Սարգսյանը, ողջունելով հյուրերին, կարևորեց ազատական շուկային անցումը և հողերի սեփականաշնորհումը: Ըստ նրա՝ այսօր պետք է բացահայտել այն ներուժը, որ առկա է գյուղատնտեսությունում: ՀՀ գյուղատնտեսության առանձնահատկությունն այն է, որ ունենք 430 հազ. հա մշակովի հողեր՝ 340 հազ. տնտեսությունների պարագայում, ինչը նշանակում է, որ 1 տնտեսությանն ընկնող հողատարածքների ծավալը բավական փոքր է, և դա պետք է հաշվի առնել աշխատանքները կազմակերպելիս:
Վարչապետն ընդգծել է, որ 2012 թ. նույնպես հռչակվելու է գյուղատնտեսության զարգացման տարի: Հանրապետության 55 համայնքներում Համաշխարհային բանկի օժանդակությամբ ներդրվելու են կառավարման նոր մեխանիզմներ, և ձևավորվելու են կոոպերատիվներ: «Խթանվելու է կոոպերացիան, ինչը կբարձրացնի գյուղատնտեսության արդյունավետությունը տարեկան առնվազն 30 տոկոսով»,- նշեց Տ. Սարգսյանը՝ հավելելով, որ պետությունը գյուղտեխնիկայի ձեռքբերումը համաֆինանսավորելու է 50%-ով: Նրա տեղեկացմամբ՝ նմանատիպ միջոցառումներ իրականացվելու են նաև գյուղատնտեսության բոլոր բնագավառներում՝ սկսած սերմնաբուծությունից, ավարտած այգիների կառավարմամբ:
ՀՀ էկոնոմիկայի նախարար Տիգրան Դավթյանի խոսքով՝ գյուղատնտեսության ոլորտն արդեն սկսել է կայուն տնտեսական աճի միտումներ ցուցադրել, ինչը սկսվել է այս տարի: Ոլորտի զարգացման մասին է վկայում մի շարք ձեռնարկությունների հիմնումը: Նախարարը նշեց, որ աշխատանքներ են տարվում ազատ տնտեսական գոտու ստեղծման ուղղությամբ, որի շրջանակներում թարմ մրգերի և բանջարեղենի մթերման կետեր են ստեղծվելու, ինչը կխթանի արտահանումը:
Եռօրյա համաժողովին մանակցում են շուրջ 40 սձյուռքահայ ֆերմերներ, որոնք ներկայացնում են Ռուսաստանը, Ուկրաինան, Վրաստանը, Լիբանանը, Իրանը, Լեհաստանը, Լատվիան, ԱՄՆ-ը և Ֆրանսիան:
ՀՀ վարչապետը հուշամեդալներով և պատվոգրերով պարգևատրեց ոլորտի մի շարք ներկայացուցիչների:
